Sharon & Victor & Tung Tung 幸福之家

呢排彤彤開始學講嘢，又鍾意模仿人哋的聲音同埋動作~

好似婆婆有時想咳2 下清一清喉嚨，彤彤聽到其他人咳，佢又會扮咳埋一份~

又好似婆婆有時腳痛，用手拍下痛嘅位置，彤彤有時自己坐係度無聊時，又會學婆婆咁拍下隻腳~

除咗呢 2 樣之外，彤彤近排好鍾意指住人，之後係度講 bb 話~

講完扮嘢之後，又講下平時彤彤最鍾意講的嘢，就係「乜嘢事?」我哋都唔明點解佢會成日講呢句說話，我哋又唔係成日係佢面對講，點解佢會學識講嫁呢?

二零一四年三月十六日     星期日

今日我哋帶彤彤去咗青衣公園，聽人講果度幾靚，地方又大，所以我哋就冒名而來喇，ha ha.......

二零一四年三月十五日     星期六

今日又係返 Playgroup 嘅日子，今日我哋今日遲咗幾分鐘，所以彤彤今日無得入課室玩下玩具 warm-up 下先，就直接上堂~

今日唱咗 Hello Hello Song, Days of the Week, How is the weather, Shake Shake Shake 等等~

今日 Ms Agnes 教咗唔同嘅顏色，仲拎住 d Flash Card 問各小朋友邊隻係 Red, 邊隻係 blue 等等，彤彤次次都答得岩，叻叻~ 

之後就有親子畫畫時間，要同條彩虹填顏色，今日彤彤好合作，肯比我捉住隻手仔一齊畫，又無手多多走去攪 d 顏色筆，所以個成品都叫做 ok 啦~

二零一四年三月十四日     星期五

今日除咗慶祝白色情人節之外，我哋仲同我父母慶祝生日，祝佢哋生日快樂，身體健康，福壽安康，生活愉快，事事順景~

今日又係去海港開餐，係我點整菜時，彤彤又係度攪攪震，仲係度奸笑，氹到公公婆婆笑開懷~

自從彤彤識行之後，我哋每晚係我父母家接完彤彤之後，都會帶佢去行 Aeon Supermarket，放佢落地行下，因為呢個時間，Supermaret 內唔會好多人，而且地方又大又闊落，可以好放心咁比彤彤自己行下，當然我哋要係佢後面跟住啦~

玩具每樣$10已經覺得好底的了，而家買3件仲有多個八折，真係超級底呀！~

二零一四年三月九日     星期日

今日見天陰陰，又無落雨，又唔太凍，所以就決定今日入去花卉展喇!~ 但始終今日係星期日嘅關係，真係好多人呀!~

今次係彤彤第二次去花卉展，原先諗住佢識自己行，可以同佢影下相，唔駛下下都要抱住佢，但場內太多人了，而且彤彤又行得無乜方向咁，所以大部份時間都要抱住/捉住佢先影到~

由於帶住彤彤嘅關係，今年無帶單反相機，只係帶住部 DC 仔，但又手痕想影下花，同玩下景深，唯有用部 DC 仔頂下引先，推到最大光圈，再加光圈先決模式來過下手引~

我哋大約由 2:30PM 開始，行到 6 點先走，之後就返去我父母家食飯了~

二零一四年三月八日     星期六

今日又係返 Playgroup 嘅日子，今日我哋早到咗 5 分鐘，所以一夠鐘就可以入課室玩下玩具 warm-up 下先~

10 分鐘 warm-up 時間過去，小朋友們要幫手 clean-up 返 d 玩具，但彤彤好似都仲未識乜嘢叫 clean-up，大部份同學仔，都識拎 d 玩具放入箱，但彤彤仲係拎住 d 玩具，埋到去個玩具箱度唔會放低件玩具，有時仲會係玩具箱內拎 d 玩具出來添~

之後就唱下歌仔先，今日唱咗 Hello Hello Song, How is the weather, Round and Round the Garden, Rain Rain Go Away, Shake Shake Shake 等等~

二零一四年三月五日     星期三

由新年到而家，日日都好唔得閒，攪到今日先得閒少少，可以拆咗 d 行是，再點算一下，埋單今年都係有賺的，呵~呵~

上面果排係彤彤收到的利是，下面果排係我同老公兩個人夾埋收到的利是，量又唔夠彤彤多，銀碼當然都唔夠佢多啦~

二零一四年三月三日     星期一

自從前 2 日開始小試牛刀咁行咗十幾步後，彤彤真係好似開咗"曉"咁，今日已經行得好穩，仲行得好耐都唔會跌~

今晚放工後，係我父母家接彤彤回家，我哋比佢係廳度自己行下，佢竟然一行就行咗個幾鐘，我哋中途想抱下佢/放返入 BB 床，等佢可以休息下，佢都唔肯，要自己落地行來行去~

二零一四年三月二日     星期日

由於我嫲嫲係上年尾去世，所以今年唔可以係清明的時候去拜山，要提早一個月去拜 (什麼新山不過舍)，所以今日就同一班親戚去拜山了~

我哋大約 11 點就到達，大約 12 點就離開，去荃灣一齊飲茶，之後我哋就自己去行街，親戚們同我父母就去二叔家開枱聯誼~

我哋帶咗彤彤去行下 Aeon 先，見唔係好多人，所以拖住佢行下先~

二零一四年三月一日      星期六

今日又係返 Playgroup 嘅日子，但我哋今朝晏咗起床，所以遲咗差唔多 20 分鐘先到達~

今日又係 Ms Agnes 帶上，我到達時，先放低彤彤，我再除鞋，彤彤已經快步咁爬埋去唱歌，唔理我 lor @@

今日唱咗 Shake Shake Shake 、Round n Round the Garden、Five Little Ducky、Head Shoulder Knees and Toes、Five Little Monkey、Open Shut Them and Other Opposite 等等，今日最開心係，上上下堂彤彤竟然企起身，再係課室度周圍行，之前佢係未試過唔扶嘢行的，估唔到佢無啦啦突然自己行，仲要係行咗十幾廿步先跌低，跌完又自己起身再行過，不斷係咁 loop，原來 BB 真係會突然識行嫁，迫都迫唔來的~

唱完歌後，今日有 Art Works 做，就係打手印，之後再寫上自己個名，根住就係 Story Time，但各位小朋友都唔太大興趣聽，又1-2 個仲周圍行添，彤彤就挨住我想瞓~

二零一四年二月廿八日     星期四

今日放工回家，就收到迦南寄來的信，只係得 waiting，都叫做仲有個希望，唔係被 rejected，但我估應該機會唔大了~

某日同彤彤出街，老公要去洗手間，我同彤彤就坐係商場 d 櫈度等佢啦，彤彤就扶住嘢自己行下咁，個八卦妹，見到我個紙袋入面有樽嘢(果樽係星星餅來的)，佢就係咁"莊莊"下，又伸隻入個袋度想拎出來~

二零一四年二月廿三日     星期日

之前係 Baby Kingdom 見到有 JM 報料，話 ICAC 個網有得申請 ICAC Open Day 的門票，所以我都申請咗，後來話收到 5 千幾人申請，只能安排千幾人入場，所以要抽籤，都諗住抽唔中多的了，點知又咁好彩抽中 wor，所以我哋今日就同埋表哥仔一家入場喇!~

 我哋大約 3 點就到達，之外會有 ICAC 的職員帶我哋去4 個地方參觀。首先我哋先去 3 樓大堂展覽廳參觀，有好多證物同埋模型展覽出來，e.g. 數薄、短莊、走私車等等~

二零一四年二月廿二日     星期六

今日又係去 Kiddo Zone 返 Playgroup，已經來到第13堂了，今日 Ms Agnes 無返，由 Mr. Daniel 來上堂~

又係先有 15 分鐘嘅 warm-up 時間，今日 Mr. Danial 拎咗好多玩具出來比幾位小朋友玩呀，仲有條 Tunnel 添，彤彤初時都無理條 Tunnel 的，但佢見另一位小朋友係條 Tunnel 求爬來爬去，佢又走去爬埋一份，ha ha~

二零一四年二月廿一日     星期五

又到星期五，嚟緊又有 2 日假期可以陪彤彤，真係好~

今晚放工後，我哋又去接彤彤一齊出街食飯，今次我哋揀咗去 Popcorn，貪果度近近地，又有好多 BB Shop，最重要係少人，岩晒彤彤係度慢慢學行~

食飽飽後，彤彤就好心急想落地行，但佢唔係想我哋拖佢行，而係佢想推住自己部 BB 車來行，我哋見佢咁想推，就幫佢 lock 咗 2個後 "look" ，比佢自己推住來行，咁就唔怕推得太快會跌到~

二零一四年二月十六日     星期日

今日無乜嘢做，原先諗住去動植物公園的，點知出門時天陰陰，我哋驚會落雨，所以決定改行程，老公就提議咗去黃埔~

其實黃埔呢個地方又真係幾好的，一來我哋一程車就到，交通方便，其次係呢度有 Aeon，又有一個商場係 for 小朋友的，所以好適合一家大細行~

二零一四年二月十五日     星期六

終於都等到迦南幼兒園封面試信了，由交表到而家足足等咗成 4 個月，因為係細 B 關係，所以會安排係第二輪先接見~

呢間幼兒園係我最心儀嘅學校，好希望彤彤可以入得到，但睇返 Forum d 人講面試考嘅嘢，彤彤大部份都未識做，我都打定輸數，加上今年開始無學卷，話會加深課程，即係變相更加多人會報名~

收到面試信時，裡面仲有張問卷，有好多條問題要答，所以我都好用心咁慢慢作答，仲上埋迦南個網站度搵下料添，希望答得好 d ，會對彤彤有少少幫助啦~

二零一四年二月十日     星期一

今日返奶奶家食飯，奶奶話姨婆買咗份禮物比彤彤，係個電子琴來的，仲有咪嫁~

彤彤：多謝三姨婆送比我嘅電子琴~