Sharon & Victor & Tung Tung 幸福之家

二零一四年一月十二日     星期日

隔咗 2 個月無去過海洋公園了，見今日早起床 (9 點半)，所以今日又帶彤彤入去玩下~

我哋先去食早餐先，而彤彤就趁呢個時間瞓返陣先，點知佢係 BB 車瞓醒時，有一束頭髮豎起咗，好攪笑 lor~

二零一四年一月十一日     星期六

今日又係帶彤彤返 Playgroup，但我哋遲咗少少先去到，所以 miss 咗 warm-up 時間，令到影唔到彤彤上堂時嘅情況~

今日主要都係唱下歌，好似 How's the weather，Five little ducky，Days of the week等等~

最攪笑係今日 Ms Anges 教各位小朋友講 Saturday，當我好理想當然定認為，所有小朋友都應該唔識講嘅時候，彤彤竟然好大聲咁讀咗一次 Saturday 出來，其他家長 (包括埋我自己) 都覺得好不能相信，Ms Anges 仲走埋來摸一摸彤彤個頭仔，讚佢 Smart Girl 添~ (其實我覺得佢撞彩多~)

之後 Ms Anges 又拎咗 d Flash Card 出來，教小朋友們 1 - 30 嘅英文，Ms Anges 叫彤彤讀一次 One，彤彤竟然又讀到出來，又係得佢一個讀到，之後 Ms Anges 拎住 2 張 Flash Card 問佢邊張係 One， 彤彤第一時間就揀岩，Ms Anges 又讚多佢一次 Clever Girl~

二零一四年一月十日     星期五

呢排彤彤可能又開始出牙仔，成日咬手指不特止，仲成日周圍 bu 口水~

咁日間彤彤係公公婆婆家中時，會企係窗邊睇風景的，但由於佢呢排成日 bu 口水，婆婆就要幫佢抹返 bu 咗落窗嘅口水，彤彤見婆婆拎住塊抹窗時，可能佢覺得幾好玩，所以就搶咗婆婆塊布，然後自己係咁係度抹，睇下佢好似幾有姿態，仲好似幾有實際添~

二零一四年一月九日     星期四

之前幫彤彤報名參加咗荷花親子網舉辦嘅「潮B有獎攝影比賽」，12 月嘅主提係「聖誕大食 B」，好開心彤彤被揀中，成為 12 月份嘅 5 位優勝者之一，獎品係由 SENS Studio 送出嘅 $1088 攝影套餐一份~

今日特登放咗個半鐘 Time-off，過去太古荷花嘅 Office 拎張 coupon，原來 $1088 嘅攝影套餐包咗下便呢 d 嘢：

1) 90 分鐘攝影時段

2) 10 個相片檔案

3) 10 張 4R 相

二零一四年一月五日     星期日

今日帶咗彤彤去科學館睇恐龍展，未入場前，係門外已經有幾隻恐龍係度比人影相~

二零一四年一月四日     星期六

休息咗一個月，今日又到咗返 Playgroup 嘅日子了，今日彤彤升咗班，讀 Stage 2，連續返 12 個星期，就會有証書拎返~

今日又係 Mr. Daniel 同埋 Ms Anges 同一班小朋友一齊上堂，頭 15 分鐘係 play-time，有唔同嘅玩具比小朋友玩，彤彤都玩得好開心~

二零一四年一月一日     星期三

今日係新一年的開始，祝我哋大家新年快樂，身體健康~

特別祝老公係新一年搵到一份好工，工作順利~ 亦都祝彤彤快高長大、聰明伶俐、聽教聽話~

今日帶咗彤彤去屋企附近，康文處嘅兒童遊戲室，等佢可以係安全嘅環境下，試下企同埋行~

二零一三年十二月三十一日     星期二

今日我公司如常地無得放早，但老公公司就可以早 2 個鐘走，所以老公就先返去我父母家接彤彤先，之後我哋再一齊出街食飯~

由於彤彤仲細，我哋唔想同人迫，所以都係揀 d 比較少人嘅地方先去，今日揀咗去太古廣場~

先去食飯先，之後就行下街，Aeon 、H&M、Uniqlo 果 d 都有行，最後就影埋聖誕佈置，就返屋企，準備倒數 2014 年~

二零一三年十二月廿九日     星期日

來到長假期嘅最後一日，真係有少少唔捨得添~

今日原先打算去海洋公園的，仲點知遲了起床，所以都係改去屯門行下街街~

我哋先去 V city 行下街先，見到有聖誕佈置，當然又係影影影啦~

彤彤呢排出牙仔，所以牙仔痕，成日都咬嘢，近排仲成日不經意咁一啖咬落我度，仲要幾大力，見到牙印嫁~

二零一三年十二月廿八日     星期六

今朝一早起床，要去圓玄學院，因為我嫲嫲嘅骨灰會安置入靈位，所以我哋要去拜一拜~

拜完阿嫲後，就落返荃灣飲茶，之後我哋就係荃灣行下街，我哋仲帶咗彤彤去荃灣廣場 5 樓果個公園玩，彤彤第一次去公園玩，玩得好開心，仲第一次玩搖搖馬添~

二零一三年十二月廿五日     星期三

今日瞓醒嘅時候已經差唔多 11 點了，起床後餵奶，再同彤彤沖涼，攪到差唔多 1 點先攪掂，準備出門口，點知彤彤扭眼瞓，所以我就陪佢瞓啦，結果係大家一齊瞓到4 點先起身，ha ha.....

由於時間都唔早，又唔想同好多人一齊迫，所以我哋揀咗去黃埔，起碼有間 Aeon 可以行下街，果度又多嘢食，應該唔駛點等位掛~

但原來我嘅諗法係錯的，平時唔太多人嘅黃埔，今日竟然有少少迫，仲要好多地方都要排隊等位~

最後我哋揀咗食牛涮鍋，由 6:40PM 開始等位，等到 7:50PM 先有位，真係企到腳都攰埋，好彩等位期間，彤彤瞓咗咋，唔係又會扭計(因為架 BB 車停係度唔郁，佢覺得悶)， 到時就煩了~

二零一三年十二月廿二日     星期日

今日帶彤彤去參加另一個爬行比賽，係由 Baby Kingdom 主辦的，比賽一開始，彤彤已經好努力咁爬，仲遙遙領先其他同組對手，點知到終點前一步，佢竟然坐咗係度，我再用玩具引佢爬埋罺一步，點知彤彤心急想搶我手中嘅玩具，個頭撞到個玩具一下，佢即時唔爬，仲扁晒咀喊添，結果佢見隔離線嘅 BB 爬過終點，佢先爬埋果步，就係咁就無咗佢人生中第一張冠軍証書同埋得獎小禮物喇!~

參加完比賽，我哋就將軍澳廣場行咗陣，再影下相~

二零一三年十二月廿一日     星期六

同彤彤係 Piggy Ducky Studio 影完相，我哋就過咗去 TST，趁彤彤瞓咗教，我哋先去和民食飯先~

二零一三年十二月廿一日     星期六

今日帶彤彤參加爬行比賽，今次大會好好，仲送多 2 小時 Playhouse 的家庭套票比參賽者，所以完成比賽後，我哋大約可以留係度玩多個半鐘~

今日嘅比賽，彤彤被安排於邊線作賽，初初佢坐係度唔郁，黠知當其他對手爬了 1/3 時，彤彤突然一枝箭咁爬去終點，仲以小組第一名完全添，真係估佢唔到，叻叻!~

因為今日有好多場比賽，所以最終排名，大會要遲少少先公佈出來，據說最快果3位BB會有豐富獎品的~  (後記：彤彤三甲不入，不過唔緊要啦，輸羸其次，enjoy 比賽過程就夠了)

二零一三年十二月十八月     星期三

今晚提早同我父母食冬至飯，因為正日要返老爺奶奶果邊食，今日我哋又係去海港食，但出奇地今日又唔係好多人咋 wor~

坐好後點菜，係等上菜時，為食豬仔好心急想食嘢，所以我哋又要出絕招，就係酒樓嘅濕紙巾喇，睇下彤彤有得玩，即時笑得幾咁奸~

二零一三年十二月十七日     星期二

今日放工後，我哋返咗老爺奶奶家食飯，點知我同彤彤一入屋，彤彤就即時扁嘴想喊，之後一見到爺爺，就即大喊添~

我即時安撫返佢，話 Daddy & Mami 係度，唔係唔要你，經過一輪功夫，佢先平復返~

爺爺見咁嘅情況，即時入返房，唔敢再刺激佢。我哋陪佢玩咗一輪，佢又笑返，諗住抱佢入爺爺房，都未入到房，只係响門口就已經喊了，咁唯有放棄啦~

但彤彤見到嫲嫲又無嘢嫁 wor，仲對住嫲嫲笑添，又同嫲嫲玩到好開心~

新排彤彤開始識自己企，有時仲可以唔駛扶住嘢都可以企到起身，仲可以企得耐咗，有時超過 1 分鐘先坐返低，雖然係遲咗少少，但總算係有 d 意慾肯去學企，加油呀!~

自己企係度睇電視，仲食手手添，No good!~

有一晚瞓到半夜 4 點幾，彤彤醒咗，仲企咗起身好耐，唔知係度望緊乜，張相係老公影的，當時我仲瞓緊~

二零一三年十二月八日     星期日

尋日要返工，無得帶彤彤出街，所以今日補返數~

今日我哋帶彤彤去奧海城，都有成 3 年無去過呢個商場了，今日主要為咗個糖果樂園而來，好 Colourful 好靚，所以特登帶彤彤來影相~

二零一三年十二月七日     星期六

因為公司有新 System 要係下星期一 roll-out，所以今日要返工公司做定準備工作；而老公就因為要去考試，唔得閒睇住彤彤，所以今日彤彤要由公公婆婆睇住~

因為工作關係，今日無得同彤彤出街，真係好唔開心呀，所以一放工，我哋就返咗公公婆婆食飯，我仲買咗彤彤鍾意食嘅蛋糕作為補償，老公又同彤彤玩騎膀馬，彤彤仲玩得好開心添~