Sharon & Victor & Tung Tung 幸福之家

二零一四年十一月一日     星期六

老公 1:30PM 就來到公公婆婆家中，同我哋一齊出發去今日的第三站 - 平田救世軍幼稚園~

我哋早了 10 分鐘到達，所以先在門口等下，玩下車車先~

之後就叫我哋入去，先交回問卷，再入去面試等候區玩下玩具先~ 

之後就入去一個課室，聽校長介紹學校，彤彤又開始坐唔定，全程係度四圍走，初初幾次我都無捉返佢返來，但佢次次都係度爭扎同扭計，所以我都由得佢四圍走算了，反正呢間學校都係 for 後備之用，正選一定唔會揀，因為地方細同舊，同埋唔見有 NET 老師，再加上個校長自視過高 (佢介紹學校時講到間學校幾受歡迎，什麼 50 人爭一個位，叫我哋要去考多 d 學校，又話一係轉做大 B，而家改報佢哋學校出年的 N 班)

聽完校長 20 分鐘的自吹自雷後，就可以去大肌肉訓練區，要小朋友玩大件的海綿積木，但彤彤好曳呀，自己唔砌不特止，見其他人砌高了，就走去推跌人哋的積木，又係度掉積木，我已經多番阻止，但都無乜用，佢都仍然照係咁，呢度實扣晒分啦，唉~

之後老師叫小朋友行平行衡再 sir 滑梯，彤彤完全無問題，行得好快，仲唔想我拖住佢行添~

之後老師再叫小朋友行另一條平衡木及獨木橋，之後再行斜路落返地下，前面果位小朋友好驚，行得好慢，彤彤行得好快，又心急想行，成日想過人頭，不過我叫佢等前面位小朋友行埋先，佢都有照做，全程我都無拖彤彤，係佢自己完成的~

老師再叫彤彤去爬隧道，彤彤當然無問題啦，佢返 Playgroup 時都有玩過，不過有小插曲發生咗，就係佢爬晒成條隧道，準備起身行出來時，佢條裙太長，成日都踩住咗，所以我都要幫一幫佢先起到身~

之後老師就叫彤彤同埋另一位小朋友一齊入課室面試~

同彤彤同組的係一位小男孩，都係細 B 來的，老師先問 2 位小朋友叫什麼名字同幾多歲，但 2 位小朋友都無回應，跟住老師話 2 個都係細 B ，咁唔緊要啦，之後就問家長，平時邊個照顧小朋友~

然後老師拎咗個假麵包出來，問小朋友係乜嘢來? 彤彤即時話包包，另一位小朋友就無出聲~

之後老師拎咗 d 水果出來，問小朋友係乜嘢來? 彤彤無出聲，另一位小朋友就用英文回答到，老師再問多一次彤彤，我已經提佢 A for XX ? 佢都係唔出聲~

之後老師問彤彤邊樣係雪糕，彤彤無反應，另一位小朋友都係無反應，不過果位小朋友見到隔離枱有 Thomas 車仔，同媽咪講 I want Thomas，老師問佢媽咪，平時係唔係比工人姐姐照顧小朋友?

老師拎住頂帽問彤彤知唔知係乜來? 彤彤即時戴係頭上，仲戴咗好耐添~ 雖然前後掉轉咗，但又戴得幾四正 wor，所以老師都讚佢叻叻 wor，知道係戴係頭上~ (彤彤識咁樣戴帽，真係幾出奇，因為佢由細到大，都最憎戴帽嫁，我哋一幫佢戴帽，佢就會掉走頂帽的)

老師拎咗 2 sets 手抓板出來，先問彤彤想要玩邊款，彤彤揀完後，就比另一堤比另一位小朋友，然後叫佢哋開始砌，彤彤好快就完成，而另一位小朋友就唔太知點砌，要佢媽咪幫手砌，所以老師叫彤彤等埋另一位小朋友先~

另一位小朋友及媽咪砌好後，老師就收返晒 d 手抓板，再拎了 2 籃珠仔出來，每籃有 5 粒，叫小朋友穿好 d 珠仔，當然難唔到彤彤啦，佢平時都有玩開的，彤彤好快就穿好晒，而另一位小朋友，由佢媽咪幫佢手，都好辛苦先穿到一粒，老師安慰佢哋話穿到一粒都當得嫁喇~

之後老師話面試完畢，可以離開，我叫彤彤同老師講 Bye Bye，彤彤都有講，仲有揮手添，之後我再叫彤彤推返埋張櫈，佢只係推咗一下，無完全推埋晒~

臨出課室前，老師送咗一架車仔比彤彤，但彤彤唔玩果架，想要另一隻色，佢就比返原先果架比老師，再拎另一架，老師都肯換比佢，我叫彤彤講多謝，彤彤初時唔肯講的，老師就話唔講多謝要收返架車嫁，我再係佢身邊不斷提佢講多謝 / Say Thank You，最後彤彤都有講咗句多謝~

出咗課室後，我哋會合返 Daddy，再同 Daddy 講返彤彤的表現，我哋都認為彤彤嘅表現大致滿意，唔係完全無機會~

之後我哋就搭車去下一間幼稚園，出席面試~