Sharon & Victor & Tung Tung 幸福之家

星期二晚呢場波，真係可以用 peter wong 的名句 "有今生無來世" 來形容 ~

事後睇返場波，真係覺得好精彩~

上場作客，利記因為輕敵，比車仔偷了雞，作客羸了 3:1。但唔好忘記，利記係一隊神奇球隊，成日都可以創造奇蹟，佢哋曾經係歐聯決賽用 45 分鐘間，就可以追返 3 球，所以今次佢哋要係 90 分鐘內追 3 球唔係話無可能嫁 ~

再加上車仔近排的防守好似好有問題咁，係主場都可以比保頓之流，用 8 分鐘的時間入 3 球，今場仲要泰利停賽，你話唔擔心就呃人的~

賽前我真係唔敢睇的, 所以特登夜 d 先瞓，差唔多等到成 2 點，諗住會瞓到天光先起身, 但我真係太掛住場波了，結果我 4:45am 就醒了，根住即刻手機 check 賽果, 見到個賽果時都嚇了一跳 ~

之後太興奮了, 都瞓唔返, 所以上網睇下 d 賽後報告同上下 d forum 睇下咁，攪到成 6:15 am 先瞓得返著，結果尋日返工又遲到了 ~

講番場波先，如果我係現場睇的話，我估我未必可以受得住果種壓力，因為心情的起伏係超大的 ，我估我的心情應該會好似下面咁：

1)   落後 0:1 時，距離安全線雖還有兩球，但已經開始焦慮，因為實在係太早失波了, 而且仲係因為門將的犯錯而做成的入球，多少會影響球隊的信心 。 

2)   落後 0:2 時，心跳應該會急速上升，因為只要再失一球便被反超前，係咁大優勢的情況下比人踢出局，真係比人笑都笑死呀 ~ 

3)   追返 1:2 時，應該會大叫 「 杜奧巴，well done ~」，同埋開心返 d，唔駛太擔心住~

4)   追和 2:2 時，即刻成個鬆晒~

5)   反 勝 3:2 時，一定以為大局以定，利記一定無機會啦，諗定去慶祝都得喇 ~

6)   比人追和 3:3 時，都未至於太擔心，但都開始又緊張過~

7)   比人反勝 4:3 時，肯定坐立不安，因為對手只要再入一球，車仔便會因為作客入球唔夠人多而出局 ~

8)   追和 4:4 時，應該會大叫 「林柏，I Love U~」， 終於可以舒一口大氣，唔駛再擔心了 ~

9)   艾辛護空門時，應該會大叫「好彩有艾辛咋~」唔係就又要再驚過了 ~

入到 4 強，車仔的對手係而家風頭正盛的巴塞隆納，對手的攻擊力係全歐洲之最，以而家車仔的防守力真係未必低檔得住，所以我覺得應該要智取，唔好強攻或死守，因為攻又唔夠人哋全面，守的話又唔頂得幾耐，所謂久守必失，所以我覺得一定要打防守反擊的戰術，同埋要好好利用死球同角球戰略，先有少少希望 ~

仲有一個擔心就係 A. Cole，係首回合作客的賽事要停賽，左閘位置根本就無人可以頂替 (因為 1 月的時候賣走了布力治)，所以都唔知搵邊個頂佢個位，而且仲要對住美斯添，真係好難攪 ~

如果比我選，我會揀馬路達來打左閘，因為佢初出道的時候係打左閘出身的，後來先改打左翼，所以應該可以頂得下，但咁就會削弱了左路的進攻。另一個選擇係用艾辛打，但咁就會浪費了艾辛了，希丁克真係要用呢 2 個星期的時間好好咁諗下先得啦 ~

但好老實，我真係唔太樂觀，我估車仔都係得 2 成機會可以晉級，除非又有奇蹟的出現啦 ~

原先我真係唔覺得希丁克有幾勁，成日以為佢係好彩先有咁的成績，但睇完對利記呢 2 場波，我真係開始相信同欣賞佢了~

呢排利記個勢咁勁，佢竟然可以帶領車仔智取利記主場；又係車仔主場時，落後 2 球的情況下，憑住一個換人(安力卡換卡奴)，同埋中場時的指導，將場上的劣勢扭轉，仲要曾經試過反超前添，真係唔到我唔佩服佢 ~

曾經我以為摩連奴係最好的教練，同埋係最適合車仔的，但我而家改觀了，原來希丁克都有呢個能力嫁 ~ 不過我始終都係主觀地認為摩連奴先至係最好，但大家都知道摩連奴同油王鬧反了，一日油王仲係度，摩連奴都唔會再返來的了，所以而家最實際要做的嘢係留住希丁克 !!!