Sharon & Victor & Tung Tung 幸福之家

二零一五年六月七日     星期日

晚上 11 點時，收到 Jacky send 過嚟嘅，估唔到飛走咗唔得嘅相，都仲有520限可以取回，仲要大部分都影得彤彤好開心，真係多謝晒 JT Studio 的攝影師哥哥 Jacky，亦都辛苦晒佢係咁熱的天氣下幫我哋影相，唔講咁多，去相先~

二零一五年三月十四日     星期六

約咗今日上 Piggy Ducky Studio 揀相，但老公今朝要去見工，趕唔切 2 點去到 CWB，所以就由我帶埋彤彤上去揀相~

原來上星期影咗 143 張相，要揀 20 張相，其實唔太難，因為有好多係重複 pose ，仲有部份係笑得太誇張，或者係食餅時食到嘴仔都有餅碎，呢 d 就一定唔會揀啦~

另外，我哋同彤彤嘅合照，因為果日彤彤唔多合作，影出嚟嘅相嘅效果麻麻，我都無揀到~ 所以揀咗半個鐘度，就完成任務~ 唔講咁多住，去相先~

二零一四年五月十七日     星期六

呢輯又係一輯免費的相，因為之前係 Face Studio 個網頁申請做會員，就可以抽一次獎，而我哋就抽中咗一個攝影套餐，包了 15 個檔案~

影相當日 (5 May 2014)，彤彤的狀態麻麻，有少少眼瞓，所以影到第 3 套衫時，已經無晒電咁，只係坐係地上，唔肯企起身了~

今日 (17 May 2014) 上去揀相，一共影了 131 張相，第一輪我哋已經揀剩 40 張，當中有要好多係重複的 pose，所以再揀多一次，已經剩下 20 張，最後我哋再 cut 多 3 張，剩返呢 17 張，我哋都費事再揀了，埋單比了 $136，仲低過係團購買來影~

二零一四年五月十日     星期六

之前係 SENS Studio 影咗輯相 (25 Apr 2014)，果日都影得好開心，彤彤仲玩到癲晒咁~

影呢輯，原先係唔駛錢的，因為之前幫彤彤參加咗個 BB 相比賽，彤彤張相成為 5 名優勝者之一，所以我哋就贏咗呢個攝影套餐喇~

呢個攝影套餐包了 10 張相底同埋一個8 寸相架，當日影咗 139 張相，要係其中揀10 張出來真係有點難(加一張相要 $100)，因為 d 張真係影得好好，而果個 Slideshow 真係整得好正(價值 $1000)，所以經過一番議價後，就揀咗呢16 張相，同埋個 Slideshow，埋單 $1000~  

二零一四年二月十四日     星期五

今日係 19 年難得一次嘅雙料情人節，當然要做 d 特別嘅嘢來慶祝一下啦~ 

其實都係唔乜嘢咁特別，只係帶彤彤去 Studio123 度影相，不過今次除咗我哋 3 個之外，仲叫埋公公婆婆一齊影全家幅大合照，之後再去食飯慶祝~

今次係彤彤第 6 輯 studio 影的相，由於之前已經影過幾次，所以彤彤好快就投入拍攝~

今次嘅 Package 係 $488 包 28 張相同 5 個造型，如想買晒所有相只需另加 $300，所以我哋 preview 完所有相之後，見影得幾好，就費事揀買晒所有相算數，一共有 141 張相~

二零一四年一月四日     星期六

上月尾影果輯團購相，今日可以去揀相了，所以上完 Playgroup 就去食 Lunch，之後就上去揀相~

由於係團購買嘅 package，所以包嘅嘢唔多，$288 包 20 張相同 2 個相架，而我哋揀星期六影，所以要另加多 $200，即係總數 $488~

今次一共影咗 17X 張相，講真加相就一定唔會加的，因為加一張相要加 $100，實在太貴，其次係我哋覺得唔係全部相都影得好好，有部相係 out focus，亦有 d 角度唔知想點咁，所以我哋第一輪已經揀剩 48 張~

之後再係呢 48 張內，再選出 20 張，因為有部份係好相似嘅 pose，又有 d 係相同嘅景，所以好易就揀到 20 張出來~

二零一三年十二月廿七日     星期五

由於我同老公都一早拎定呢日假期，所以我哋可以連放 5 日假，咁岩又見到 Soha Studio 做 promote，平日影相只係 $500，仲包4 個造型同埋所有相的 file，所以即時打電話去問 27/12 有無位影，好好彩仲有一個當日最早嘅 Booking 時段(11:00AM)，所以即時 confirm~

今日 11 點我哋就到達了，一入門口，又係上次果位攝影師哥哥招呼我哋，今次佢哋搬咗新 studio(荔枝角)，地方大咗好多呀，仲多咗好多造型同佈景添~

攝影師哥哥先比部 iPad 比我哋揀造型先，我哋揀咗家庭照、米奇老鼠、和風同埋 Pink Laby~

先影家庭照，都係好似上次，擺出唔同嘅 pose，彤彤影得好開心 (因為其中有 d  pose 係要拋起佢的)~

二零一零年五月廿五日 星期六

彤彤今日第二次去 studio 影相，今日彤彤嘅狀態好好，心情亦好開心，所以好合作，短短 20 分鐘嘅拍攝過程，都可以影到 65 張相，而且全部都笑容滿面的。

個 plan 係 $100 試影包 4 張相，後加就每張 $30，每加 10 張送一張。經一輪篩選，最後揀咗 20 張，埋單用咗 $550，都算 ok 啦~

二零一零年三月二日     星期六

趁住放完產假前最後一個 weekend，帶咗彤彤第一次去 studio 影相，頭3個造型都非常合作(家庭相、網袋、毛巾)，到第4個造型(Winnie the Pooh)時已經有少少扭眼瞓，但氹氹下都仲可以影得晒，可惜影到最後一個造型(Super Mario Bros)就係度喊爆，可能真係太攰的關係，抱住佢一陣，就係喊聲中進入睡鄉了。

雖然只係用咗個半鐘影咗4個造型（最後果個造型只影咗1張），但都影咗95張相，我哋睇過 d 相後，大部份都覺得幾好，特別係影彤彤果 d 造型照，所以決定加多 $280 買晒 d 相底 (原先個 plan 只包 28 張相底)，total用咗$768，都算ok啦~