Sharon & Victor & Tung Tung 幸福之家

二零一三年十一月十日     星期日

彤彤今日一歲生日喇！~

回想一年前嘅今日，因為妊娠毒血症被迫提早催生，又擔心作動時 d 血壓會不斷升高，令到我同你都有生命危險，當時由早上九時多，一直擔心到晚上八時，最後醫生宣佈催生失敗，要緊急開刀拎你出來，當時真係又驚又擔心(你要知道媽媽我係一個連打針都怕的人來，仲話要開刀，可想我當時有幾驚)~

開刀嘅過程雖然唔係好耐，但醫生落刀時，我係全程都感覺到痛楚的，因為之前做了差不 10 個鐘嘅無痛分娩，半身麻醉時唔可以再加太多麻醉藥，驚有後遺症，除非轉用全身麻醉，但我又好想睇住你出世，所以媽媽只好頂硬上，好彩好快就過了，見到你嘅一刻，所有嘅痛楚都忘記晒了~

過去一年，睇住你慢慢成長，由初時好似一團麵粉、到開始學抬頭、喊住口仍然堅持想反身、學坐、扶住嘢企起身、學爬等等，所有一切我哋同你經歷嘅第一次，我哋都會深深記住，將來到你大個時，會一一與你分享~

雖然你到而家一歲大，你仲未學識唔扶住嘢企，未識學行，唔鍾意食固體餐，仍然以奶奶為主要食糧，但我哋知你努力緊，知你要時間慢慢適應，我哋唔會迫你的，慢慢學習吧，我哋會一直支持你的~

彤彤，你一歲大喇，Daddy & Mami 祝你身體健康、快高長大、聰明伶俐、聽教聽話、天天開心快樂！~

二零一三年十一月九日     星期六

原先今日彤彤要返 Playgroup 的，但見佢仲係好攰，同埋仲有少少鼻水咁，所以就打電話去 Kiddo Zone 請假~

之後老公話想去影下相 (商場嘅聖誕節佈置)，所以就去了青衣城影 Bear Bear~

二零一三年十一月八日     星期五

之前係日本代購到訂咗部 iimo 三輛車比彤彤，作為佢的一歲生日禮物，原先話 11 月中先到香港，點知突然收到通知，可以早 d 送到，真係好，可以趕係彤彤生日前送到~

我放工回到我父母家，已經見到個紙盒~ 

之後就拆箱，再安裝好部車仔，彤彤見我係度整緊，佢一路望到實，又大叫，真係心急~ (今日彤彤雖然退晒燒，但就開始有少少咳，同埋好似仲係好攰，無乜精神咁，但呢刻佢成個人生猛返晒)

二零一三年十一月七至十日     星期四至六

之前都係估估下，懷疑彤彤出玫瑰疹，而佢又真係有 d 紅色粒粒出咗，點知以為佢應該好返啦，點知佢又開始咳咳 (應該係我傳咗比佢)，所以就比返之前醫生開定的止咳藥比佢食~

過多 2 日，佢 d 咳好返晒，點知又到傷風，仲鼻水長流添，好彩之前個醫生都有比定通鼻塞同止鼻水藥，咁又比佢食埋，先好返咋~

呢幾日彤彤病咗，見佢成個人無晒精神，乖乖咁坐/瞓定定，真係好擔心，Daddy & Mami 寧願要一個百厭，愛搗蛋的你，唔好再病病了~

二零一三年十一月四日     星期一

今朝如常係返工前帶彤彤過去我父母家，由於今朝公公有事要出一出去，得婆婆一個照顧彤彤。中午時間，婆婆同我傾電話時，仲話彤彤今朝好乖，瞓咗成 4 個鐘先起床，飲奶時又無扭來扭去~

飲完奶，公公就回來，見彤彤好似無乜精神咁，以為佢只係有點攰，又摸過佢無發燒，所以就抱住彤彤瞓多陣啦~

點知到 3 點度，公公打電話來話彤彤有少少發燒 (38 度)，帶咗佢去睇醫生，醫生比咗退燒藥，又比定 d 傷風止咳藥比彤彤，之後就回家~

回家後，公公話彤彤無晒胃口，唔多肯飲奶，d 藥又食得少少就唔肯食，個身又有 d 熱，攪到我不知幾想即時回家睇佢，好彩仲有一個鐘就放工，所以快手攪掂 d 手尾就回去睇下彤彤~

二零一三年十一月三日     星期日

今日我哋又同彤彤參加咗另一個爬行比賽，係 Mikki 舉行的「米奇生日派對 --- 開心“爬地”」，比賽前，我哋先去醫肚先~

二零一三年十一月二日     星期六

今日我唔太舒服，一早就去咗睇醫生，之後就同彤彤一齊過 CWB 返 playgroup，但今日由於我病了，所以由老公陪彤彤上堂~

未夠鐘上堂前，有少少 warm-up time，所以我就係外圍同佢哋 2 父女影下相先~

二零一三年十月三十一日     星期四

今日係彤彤舊曆一歲生日喇!~ Daddy & Mami 祝你身體健康、快高長大、聽教聽話、聰明伶俐、天天開心~

今日放工返我父母家接彤彤，公公婆婆已經預定咗 2 封大利是比彤彤，祝佢快高長大、身體健康、精乖伶俐~

彤彤: 多謝公公婆婆比我嘅生日利是~

二零一三年十月廿八日     星期一

今晚飯後，如常地陪彤彤係床上玩下玩具，點知突然見佢可以唔扶住嘢都企到係隻，仲要試咗幾次，每次都可以維持到 4-5 秒，所以即時搵部手機影低佢先~

二零一三年十月廿七日     星期日

今日又諗唔到去邊去，所以老公話不如又去海洋公園玩~

今日都幾熱下，朝早睇天氣簡報話 19-24 度，點知入到去海洋公園成 30 度都有呀，等我仲幫彤彤著咗件厚身 d 嘅衫添~

入到去，趁住彤彤仲未眼瞓，我哋先去咗老香港果邊影下相先~

二零一三年十月廿六日     星期六

今日彤彤唔駛返 Playgroup，而佢又咁岩抽中可以參加係數碼港舉行嘅「HUGGIES哈囉小B爬爬爬」，所以就晨早搭巴士入去 (因為彤彤係抽中 1:00 - 2:00pm 的時段)~

我哋早上 11 點先出門口，結果都差唔多 1 點先去到，到達後先去登記，然後就拎紀念品同埋印有編號的 label，之後就係等比賽~

由於彤彤被編排去第 8 組出賽，所以我哋都要等一段時候先得，咁我哋就四圍同彤彤影下相先~

二零一三年十月廿四日     星期四

今日放工後同老公去咗衛訊買新手機 - LG G2，因為我用緊果部 iPhone 4s 個 wifi 成日都有問題，趁佢未 c 晒前都係換機好 d~

原先諗住換 iPhone 5s 金色的，但等來等去都未見有貨，老公又成日叫我試下用 Android 機，話部 G2 好好用(佢早 2 星期已經買了)，仲比埋佢部機我試玩咗一晚，結果決定換機~

買完機就去食飯，之後就同彤彤影下 Halloween 嘅佈置~

近排夜晚都係放彤彤係床上玩玩具，多數都係比 d 積木佢玩，同埋比書書佢睇~

其實我無教過佢點玩積木的，只係比一埋積木比佢自己玩，佢就好自然咁拎起 2 粒積木來互相敲敲下，再望幾下，然後就丟落地上，再望下跌咗去邊，之後就再拎過另外 2 粒來玩，全個 steps 又再 repeat 一次~

二零一三年十月廿日     星期日

重陽節補假果日，因為落雨去唔成馬灣公園，所以今日補返數~

我哋先去葵芳食 lunch 先，今次去咗嚐越食，order 好食物後，我哋抱彤彤出來，點知佢條片片又漏了，成條褲仔濕了一大片，好彩我有帶多條褲仔咋 (不過同件衫有少少唔襯 lor)~

講開又講，呢排彤彤成日都有漏尿的情況，唔知係唔係因為佢對腳仔無時停，郁到條片片攪到漏尿呢? 係唔係要幫佢轉著學習褲呢??

因為已經 order 咗食物，所以老公要留係餐廳，而我就帶彤彤去換片片，但近排彤彤好百厭，一個人好難同佢換片，所以我都要好辛苦先可以換到片，期間仲比彤彤將我部手機丟咗落地下添，正一衰豬來的!!!

二零一三年十月十九日     星期六

係八月嘅 BB 展，我哋幫彤彤買多 4 堂 Kiddo Zone 嘅 Playgroup，今日終於可以上喇~ (因為太多想要星期六上，所以要等到 10 月先有位上)

今日我哋大約11 點就出門口，之後去食 lunch，食完飯，諗住搭巴士過去 CWB 上堂，點知彤彤瞓咗教，咁我哋就改搭 MTR，費事收 BB 車時整醒佢~

彤彤瞓咗唔係好耐就醒咗，仲將對腳仔 "long" 咗上 BB 車嘅前欄度添，都唔知有乜咁好 "long"?! (我哋見好多 BB 都係咁 "long" 腳，但人家都只係 "long"，但彤彤係會 un 同埋 fing 的，真係好粗魯 lor)

二零一三年十月十四日     星期一

今日係重陽節補假，原先諗住帶彤彤去馬灣公園行下的，所以我哋先過咗去葵芳食嘢先~

未開餐前，梗係同彤彤玩下先，但佢想玩張紙，多過想同我玩 lor!~

二零一三年十月十三日     星期日

由於 30 Sep 果日落雨，所以今日 Encore 來多次，橫掂上次買咗 Annual Pass，來多幾多次都唔緊要~

今日同彤彤玩咗小火車同埋摩天輪，呢 2 樣嘢之前從未玩過，因為彤彤嘅關係，我哋第一次去玩，ha ha......

 我哋先去海洋奇觀，彤彤觀察力唔錯，入到去已經知道頭頂有嘢睇，係咁望住上面，仲睇到笑晒口添，叻叻!~

彤彤呢排除咗周圍擒高擒低摷嘢玩之外，就係勁鍾意拍 keyboard，同埋搶我隻 Mouse 來玩，我拎住唔比佢玩，佢就係咁要搶，仲要罵我好唔比佢玩添，真係激 c 人~

見你咁想玩，就比佢拎來玩下，睇下有乜咁好玩喇!~

二零一三年十月十二日     星期六

之前買嘅團購 Playgroup，今日來到最後一堂了，我哋應該唔會繼續係度讀，下星期開始又會返去 Kiddo Zone 果邊上 4 堂，再睇下之後點，可能再搵下有無另一間比較下，亦都有可能繼續係 Kiddo Zone 上，因為我哋覺得果邊幾好~

 來到最後一堂，今日表哥仔無來，因為佢上午要去 interview N 班，所以今日得彤彤一個人上堂~

今堂係 4 堂裡面最好嘅一堂，都係唱下歌，玩下 Flashcard，將 d 唔同顏色嘅積木分類，同埋玩彩虹傘，玩呢 d 嘢，起碼係適合返個年齡先，唔會太深嘛~

今日彤彤表現得好好呀，老師問佢嘢，佢好似識答咁，係度哝哝哦哦咁回應；玩彩虹傘時，佢又第一個爬出去彩虹傘底，一 d 都唔驚，其他有幾個同學仔，老師拎彩虹傘出來咋，就已經驚到喊，都唔好話叫佢哋爬入去玩，ha ha.....

之前見有間 FB 嘅 Online Shop 做清貨，所以就買咗 d 衫仔同鞋仔比彤彤，不過大部份都係要出年先岩著~

其實我都知呢 d 淘賽貨，但佢個價錢，比自己淘再加埋運費，可能差唔多，或者仲要平少少，所以我選擇係度買~ 呢度買咗 $286.9，已經包埋平郵了~

Size 14: $59 (買得大了，可能要出年夏天/秋天先岩著了)

Size 95: $29 (出年夏天著的)