Sharon & Victor & Tung Tung 幸福之家

二零一三年六月十六日    星期日

今日彤彤過嘅第一個父親節，但老公因為要陪老爺奶奶返大陸玩，所以我就同彤彤留係家中，等佢哋晚上回來先出去食飯慶祝~

今日我將彤彤 d 玩具放晒入一個膠箱內，彤彤見到咁多玩具勁開心，但又唔識點拎 d 玩具出來玩，我教咗佢幾次，佢就識點樣推低個箱倒 d 玩具出來喇，叻叻!~

彤彤：咁多玩具，點揀好呢?

近呢 2-3 個星期，彤彤可能就來會出牙仔，見佢成日流口水，又成日食手仔，仲會成日好似好忟懀咁，又會係度尖叫添~

有一樣最明顯係，之前彤彤食牙膠好懶的，唔會自己拎住來咬，要其他人幫佢拎住的，或者係跌咗落床就算，最多唔食 lor，但近排佢竟然自己拎實個牙膠來咬，仲識得轉岩個位來咬添，我估佢一定係好辛苦喇，希望佢快 d 出咗牙仔，唔駛咁辛苦啦~

二零一三年六月十日    星期一

今日彤彤 7 個月大喇，時間過得真係快~

Daddy & Mami 祝你快高長大、健健康康、聽教聽話、聰明伶俐、生活愉快!~

其實玩具呢方面，我同老公嘅諗法有少少分歧，老公就覺得彤彤都仲咁細過，唔駛買玩具比佢玩住，但我就覺得應該要買比彤彤玩，可以幫助佢腦部發展嘅玩具，既然老公唔想，我唯有自己出錢買 lor, ha ha.....

呢隻獅子仔係彤彤摰愛，每次扭計/喊時，見到呢隻公仔，就會即時收聲，仲會對住佢笑添，呢隻公仔幫到唔少忙嫁!~

Vtech 音樂波波，我係彤彤 3個月大時買比佢玩，當時佢未識坐，瞓係度又玩唔到，所以佢自己諗到用腳去踢個波波，咁咪會有音樂 lor。到彤彤 5 個月大時，已經識用手去拍 d 公仔，令到個波波有音樂出。而家個波波放咗係公公婆婆家，等彤彤日間嘅時候有得玩~

呢部 Vtech 車仔，係彤彤 5 個月大時，我用 HSBC 嘅獎賞錢換購的，可以變身成搖搖馬，又可以當學行車坐，仲可以拆個駄盤出來玩，彤彤又係勁 Like 呢個玩具，坐係 high chair 上，一定要玩呢個玩具，唔係會扭計嫁~ 而家呢個玩具放咗係公公婆婆家，等彤彤日間嘅時候有得玩~

呢部係 Vtech 嘅學行手推車，由於彤彤仲未識企，所以仲未用得住，不過我哋拆咗個面板出來比彤彤玩，晚晚彤彤臨瞓前都要玩嫁~

早係前 1-2 個月，我哋發現咗彤彤原來係一位小小 Hello Kitty Fans 來的，見到 Kitty 公仔，佢會笑嫁，好似我個手機繩，衫上印住嘅 Hello Kitty 公仔，佢都會想伸手摸下，或者望住係度笑~

好似下面呢套衫仔咁，原先冇諗住買呢套衫比彤彤的，點知當彤彤一見到呢套衫就係咁笑(行去另一件衫面前即唔笑，返去呢套衫面前又笑過)，仲用手捉住唔放，爸爸話咁一於買咗佢啦~

又好似下面呢 2 條毛巾咁，彤彤係 living plaza 見到，又係愛不釋手，所以又買咗比彤彤~

5 個月大的彤彤，可以自己坐一陣，冇嘢比佢挨住都可以坐到, 但都仲係坐得唔太耐, 幾秒就會跌低~

不時都會自己同自己講嘢，又會一輪咀咁講 bb 話，開心嘅時候會大笑，仲要笑到咔咔聲果種，唔開心嘅時候會好嬲好忟憎，喊嘅時間仲會不斷叫"媽咪呀~~ 媽咪呀~~"

仍然鍾意食手指同玩口水，開始吽牙仔，成日流口水同埋想咬嘢~

21 Apr 2013 初次試食糊仔，彤彤都幾鍾意食，仲會追食，又會因為我比得慢而發忟憎添~

23 Apr 2013 晚上學識反身，第二朝即時不斷試~

4 個月大的彤彤，開始識得坐，有嘢比佢挨住可以坐得耐 d, 無嘢比佢挨住就只可以坐到幾秒~

開始想講嘢，有時一輪咀咁講 bb 話，遇到不滿又會大叫同罵人，亦都開始識叫媽咪，有時仲叫得好清楚添~

開始鍾意用手手去探索周圍嘅物件，當然仍然鍾意食手指同玩口水，可能開始出牙仔關係，成日流口水同埋想咬嘢~

彤彤仍然係一個鍾意笑同埋開心嘅 bb，會用笑容去打動別人，唔識嘅人有時都會 "liu" 下佢玩~


彤彤 4 個月大喇!~ 爸爸媽媽祝你快高長大、健康快樂、聰明伶俐、聽教聽話!~

3 個月大的彤彤，開始學反身，但仍然未成功，睇得出佢係一個有恆心同好堅持的小朋友，因為即使試極都唔成功，佢喊住都仍然會再作嘗試~

開始發出多d唔同的聲音，仲疑似識叫 mami (佢成日叫咗 "呀...咪"), 繼續喜歡有人同佢傾計; 仍然鍾意食手指，開始識玩口水，有時仲會因為玩口水而令自己咳; 開始要扭我抱 (其他人抱係會繼續扭計的，一定要我抱先會收聲); 又鍾意去街街，搭車時要睇窗外的風景~

大年初一收到的第一封利是係 daddy & mami 比的，多謝晒!~


當彤彤遇上表哥~

2 個月大的彤彤，成日都會 "liu" 人同佢傾計，當有人同佢講嘢，會表現得好開心，仲會對住對方笑同回應對方 (發出"喂" or "呀" or "咕" 聲); 又學識抬頭，仲可以 hold 幾分鐘都得; 鍾意食手指，又鍾意聽 & 睇床鈴~


彤彤 2 個月大喇!~ 爸爸媽媽祝你快高長大、健康快樂、聰明伶俐、聽教聽話!~

一個月大的彤彤，開始識得對住人笑，仲會發出一d 咕咕聲，開始要食奶咀，有時仲會玩鬥雞眼~


咁樣瞓舒服嫁咩?


陪月姨姨掃風中，彤彤個樣幾冧幾舒服咁 wor~

我認我係一個好懶惰嘅媽咪，所以個囡都 7 個月大有多，我先開始去寫返 d blog 文，去記錄低囡囡的成長，所以頭個 6 - 7 個月嘅 blog 只能用 summary 嘅形式記低，之後果D我會努力寫多D，等彤彤大個時都可以睇返 (希望做到啦，ha ha.....)~

其實第一個月，彤彤都無乜特別，只係食同瞓，同我哋嘅互動唔多，呢個月彤彤嘅主要食糧係人奶，每日飲 6 餐人奶，同 1 餐奶粉，飲人奶時可以飲 4 安，奶粉就只飲 3 安，要分 2 次掃風~

Day 5 (15 Nov 2012) - 回家後的第 2 日，成日都係度瞓，成個睡寶寶咁~

Day 6 (16 Nov 2012) - 彤彤著起呢件浴袍，又戴埋手襪仔，好似一個拳手咁，ha ha.....