Sharon & Victor & Tung Tung 幸福之家

二零一五年七月十四日 星期二

今晚上第四堂畫班，又係我放工返到公公婆婆接彤彤去上堂，今日好準時，去到畫室門口，上一堂嘅小朋友岩岩落堂~

老師出嚟接彤彤入課室，我就同佢講 Bye Bye，之後就返去公公婆婆家先~ 夠鐘就落去接返彤彤，彤彤見到我就好開心咁拎住幅畫作跑過嚟，同我哋講係佢畫的，仲話好靚~

二零一五年七月十二日 星期日

今朝一早就起床，之後快手食埋早餐，就去搭車入機場博覽館，由於車程要 1 個鐘頭 9 個字，所以我哋去到都已經 11:45 了~

咁遠點解要入嚟? 因為有好嘢玩 lor，就係一年一度的 「探索大自然遊學園 x 動物農荘」，我哋仲約埋表哥仔一齊添，不過佢哋要晏少少先入去~

由於彤彤未夠 3 歲，所以只需買幼童票就得 ($40)，真係好低玩~ 出年就要買小童票，貴好多呢 ($160)~

二零一五年七月十一日       星期六

其實一直以來，我都覺得彤彤講嘢唔係好叻，同表哥仔比，真係好似好差咁添~

表哥仔大彤彤 7 個月，回想返，未夠 2 歲的時間，表哥仔已經識叫晒所有親戚的稱呼，又識講自己想食什麼，但彤彤呢? 到 2 歲 3 個月先開始識叫幾位親戚的稱呼，但仲係唔識表達自己~ 雖然彤彤講嘢唔叻，但認知上，佢又好 OK 嫁 wor，佢識好多唔同的物品/生果/動物的叫法，佢問題係唔識用句子講出嚟，PN 班的班主任亦都有同我講過，彤彤唔識表達自己的想法，同埋老師以為認知差 (老師話問佢唔識答，我問返老師問什麼，原來彤彤係識的，只係佢唔肯開口答老師)，所以就開始留意下，有無一 d 評估可以做，睇下彤彤語言能力係唔係出咗問題~

其實仲有另一個原因，而令我想帶彤彤去做評估，就係佢近排嘅 trouble two 問題嚴重咗，扭起計上嚟，絕對唔係人咁品，伸直晒個人，拗晒腰，對腳起勢亂踢，(佢力度之大，我有時都唔夠力抱實佢，老公都係勉強抱得住佢)，有咁大聲喊咁大聲，慌 c 無人知佢扭計咁，有時出街遇到呢種情況，真係好鑼 lor~ 咁岩 6 月尾的時候，比我係 Gen Mami Blog 見到小檬學 F 發音的 post，知道有一間幼兒服務機構，有得做呢方面的評估，仲要有 Summer Promotion，$200 就可以做一個 45 分鐘的評估，分析唔同的發展情況，所以就打電話去 Book 咗 11/7 做評估~

今日老公要返工，所以只有我單拖帶住彤彤去做評估，由於治療師有嘢做緊，所以要等一陣先可以同彤彤做評估，職員好好人，開咗一間房比彤彤入去玩，仲拎咗 d 玩具比佢玩添~

二零一五年七月七日 星期二

今晚上第三堂畫班，我放工返到公公婆婆家時，彤彤已經換好晒衫等我，仲不斷同我講話去畫畫，今日好準時，去到畫室門口，上一堂嘅小朋友岩岩落堂~

之後有老師出嚟帶彤彤入課室，彤彤仲第一個自己行入去課室添，而我就係課室門口同彤彤 Say Bye Bye，佢仲笑住同我揮手~

二零一五年七月五日     星期日

之前係 Baby Kingdom 見到有媽咪講，話將軍澳廣場有 4D 恐龍展，見今日諗唔到想去邊，將軍澳又近近地，所以就一於去睇下啦~

其實所謂 4D 恐龍展，只係得 5 條恐龍同埋一條恐龍化石，而 d 恐龍就隔一段時間會擰下個頭，同埋擘大個口叫下咁，無乜特別，所以我哋影完相，就離開果度，過返去 Popcorn 行下街好過~

二零一五年七月四日 星期六

近排最 Hit 嘅人物，相信大家都估到，就係迷利兵 - Minions 喇，所以我哋當然要去湊下熱鬧，四圍尋找下佢哋啦~

今日我哋就先去新世紀廣場，估唔到好多人已經係度影緊相，仲要隻隻公仔都要排晒長龍，所以我哋先去快手食埋 lunch，先再去搵佢哋影相啦~

二零一五年七月一日      星期三

其實之前成日都想試下食添好運，但次次去到都要等好耐，所以等等下就會放棄，今日終於有機會試下喇，奧海城呢間分店，又唔算好多人，只係等了半個鐘度，就有位喇~

原先呢碟腸粉係特登叫埋彤彤食的，點知佢唔太想食~

二零一五年六月三十日 星期二

今晚上第二堂畫班，我放工返到公公婆婆家時，彤彤已經換好晒衫等我，仲不斷同我講話去畫畫~

我哋早咗 10 分鐘到達，由於上一班未落堂，所以我哋要係門口等一陣先~

二零一五年六月廿八日     星期日

今日又係好熱嘅一日，天氣咁熱，我哋唔係好想同陽光玩遊戲 lor，所以都係留係室內地方好 d，我哋揀咗去愉景新城，因為果度有好多岩小朋友玩的玩意~

係商場內，見到一整排卡通人物車，彤彤當然想玩啦，所以我哋就比佢玩咗 Kitty 果架，但當架車左右搖擺時，佢又驚到話要落地，真係細膽~

既然係唔夠膽玩，就同你影下相算啦~

二零一五年六月廿七日     星期六

係中環港鐵站行出嚟，再上埋行人天橋，已經見到迷你版嘅摩天輛，當然要影下相啦~

過咗天橋，落返地面，好快就去到新荔園的入口，我哋就係度影咗一陣相先入場~

二零一五年六月廿七日     星期六

今朝一早，我哋就約四大長佬一齊飲茶，所以老公就去搵位先，有位就 call 我出門口~

由於過去一年，大家都有唔同嘅嘢忙，所以都就唔岩時間一齊飲茶，難得今日大家都得閒，所以就出嚟吹下水食下嘢，好快就過咗 2 個鐘~

之後，公公婆婆就回家，我哋就送爺爺嫲嫲搭車，我哋就過 CWB 行下街~ 我哋先行皇室堡，原先諗住可以去影埋 Little Twins Star & My Melody，點知有 function 攪緊，唔比人行入去影相，真係有點失望~ 唯有係皇室堡行下街先啦，行咗荷花、反斗城、同埋一 d 童裝店~

二零一五年六月廿三日 星期二

之前見彤彤油顏色時，好似唔係好控制到自己嘅力度，成日都畫出界，驚佢 9 月升上 K1 時，要開始做連線練習，到時會做得唔好，所以就想比佢去學下畫畫 (因為佢都幾鍾意油顏色，只係未識控制力度)~

咁岩我父母家樓下嘅商場，有一間教小朋友學畫畫嘅畫室，所以就幫彤彤報咗 2 堂，等佢試下睇下鍾唔鍾意學先~

今晚係上第一堂，我哋早咗 10 分鐘到達，由於上一班未落堂，所以我哋要係門口等一陣先~

夠鐘就有老師出嚟帶彤彤入課室，彤彤仲拖住老師手入去添，由於我唔可以入去課室，我就係課室門口同彤彤 Say Bye Bye，佢仲笑住同我揮手添~

二零一五年六月廿一日     星期日

今日係父親節，祝各位父親都有個快樂嘅父親節!~ 由於晚上要同老爺奶奶食 Buffet，所以今日唔可以去太遠，見天色又麻麻，所以都係去 d 港鐵沿線嘅商場好 d~

我哋揀咗去鑽石山荷里活廣場，順便可以去食埋上次試過幾好食果間日式餐廳，今日好多人等位呀，我哋等咗成 40 分鐘先有位呀~

但唔知係唔係出名咗，人多咗去食，連成名作 - 繽都缺貨，仲要加價加成 $1x 一個餐，食品嘅水準都有小小下降，短期內應該都唔會再去食 lor~

食飽飽後，我哋就行下街先，之後就搭返港鐵去 Popcorn 再下街，到差唔多夠鐘就去 Popcorn 內果間假日智選酒店，同老爺奶奶佢哋會合~

二零一五年六月廿日     星期六

今日係端午節，一早起床已經見到好好太陽，天氣咁熱，真係邊度都唔想去呀~ 但放假無理由唔去街嫁，所以就一於去游龍舟水啦~ 今年都係第一次去游水咋，係屋企同彤彤換好晒泳衣，彤彤已經不斷叫我哋快 d 出門，但媽咪梗係要同你影下相先得啦~

二零一五年六月十四日     星期日

今日天氣好熱呀，太陽伯伯好勤力開工做嘢~

天氣雖然熱，但我突然好想食火鍋放題，所以就搭車去了黃埔，食牛涮鍋~

因為彤彤仲未夠 90cm 高，所以佢唔駛收錢，彤彤仲食咗好多鳥冬，又飲咗 d 蘋果汁，仲自己食咗成碗仔軟雪糕添，Yummy~ (趁住彤彤仲未夠 90cm 高，要食多幾次先得~)

二零一五年六月十二日 星期五

近幾個月，彤彤嘅便便都唔太好，成日都要隔 2-3 日先有一次便便，所以每次便便時，都會大喊同埋好辛苦，我哋睇見佢咁，都覺得慘豬豬~ 呢段時間，已經同佢轉過 2 次奶粉，但無乜改善，以前隔日用余仁生的開奶茶嚟沖奶，多數當日都可以有便便，但唔知係唔係而家大個咗，即使連續 2 日都用開奶茶嚟沖奶，都未必可以有便便~

初初開始時，都係隔 2-3 日先有一次便便，近排仲拖到 3-4先有一次便便，咁便便時當然係會爆喊啦~

就好似今日咁，公公婆婆幫彤彤換好晒校服，公公諗住同佢出門口返學，點知佢想便便，但又便便唔到，係度喊咗 45 分鐘都唔得，加上又落緊雨，公公打電話比我，叫我幫彤彤向學校請假，點知彤彤聽到公公咁講，喊住都話要返學，但佢又好想去便便 wor，所以最後都無比佢返學，要公公婆婆氹下佢先肯唔返學~

之後我叫公公帶佢去睇醫生，醫生話佢肛門已經有小小損咗，驚會發炎，要食抗生素同埋塗消炎藥膏。

另外，公公又問咗醫生轉邊隻奶粉好，醫生話唔駛特別去轉，其實隻隻都係差唔多，再問埋彤彤平時的飲食，醫生都話好正常，只好開 d 通便藥比彤彤食，等佢 keep 住日日都有便便，唔好再有心理陰影以為去便便會痛痛。

二零一五年六月七日     星期日

之前睇網上的親子 Group 分享，話沙田新城市廣場有個大確水族館，仲話係「全港首個室內互動水族館裝置─Aquarium Town」添，所以就趁今日無乜嘢做，就帶彤彤去睇下啦~


點知去到，真係有點失望，現場只係放咗大約 10 個魚缸係度，仲要唔係好大個，D 魚仔要用放大鏡嚟睇先搵到，一大班人走埋去睇，左迫又右迫咁，我哋行咗一圈就走了~


至於果個所謂「互動水族館」，又係名大於實(入到去只係係 ipad 上寫自己名，之後條魚嘅身上有你的名，你可以係大銀幕上見到佢游來游去)，絕對唔值得排成個鐘入去玩~

二零一五年六月六日     星期六

上年响 FB 抽獎抽中咗個戶外攝影套餐的，一直都唔記得要約時間去影，拖拖下拖到差唔多一年限期都就到先記得，所以快手去 book，就約咗6/6/2015小一放榜呢日去影~

之前彤彤感冒+出玫瑰疹，病咗 2 星期，我幾驚影相呢日都仲未好返呀，好彩岩岩係影相前 2 日退晒疹咋~

到朝早起床時，見到天黑黑，幾驚要改期，好彩出門口前出猛太陽~　

彤彤: 大熱天時出街街，梗係要做好保護措施啦！~

可惡嘅玫瑰疹同感冒，攪到彤彤放咗 2 星期病假~

二零一五年五月三十一日     星期日

今朝起身，見彤彤成塊面紅晒，有紅點亦有一撻撻，一對膝蓋都係，我已經覺得佢可能出玫瑰疹~

*********************************************************************

二零一五年五月三十日     星期六

今日係迪士尼銀卡特選週末，當然想帶彤彤入去玩下啦，但彤彤尋晚仲有小小發燒 (另一個 post 再講)，所以都係等佢醒咗，睇下佢精唔精神先決定去唔去玩啦~

彤彤 8 點幾醒咗，我哋先比枝早餐奶佢飲，之後再同佢探下熱，無發燒 wor，而且都幾精神，所以就決定早 d 入去，快玩幾個鐘啦~

10:45am 已經到達迪士尼，天氣又熱又焗，仲要勁曬添，好彩我一早準備定每人一把芭蕉扇同埋太陽帽，估唔到咁早就已經幾多人下~

我哋第一時間去玩揸車，好彩只係排 30 分鐘度就有得玩~