Sharon & Victor & Tung Tung 幸福之家

二零一五年五月六日    星期三

今晚放工後，就返去公公婆婆家，一齊出去食飯慶祝母親節，一家人簡簡單單食飯慶祝，祝公公婆婆，仲有老公彤彤同埋我自己，身體健康，事事順利，天天開心~

二零一五年二月十七日     星期二

除咗單反外，之前一直用開 Nikon P3100(彤彤出世前一個月買的)，細細部又輕又方便，但近排發現，想影彤彤時，好多時都對唔到焦，或者係影到濛濛地，可能彤彤而家大個咗，移動速到都快咗好多有關~

所以近排都有上網爬下文，初步都揀定咗 Canon G7 X, Sony RX-100M3, Sony A6000~

之後再 filter 走 Sony RX-100M3, 就係心大心細揀可以換鏡頭嘅 Sony A6000 好，定係唔可以換鏡頭嘅 Canon PowerShot G7 X, 最後問咗幾個朋友意見，都係覺得 Canon 好 d，因為要玩換鏡頭，不如用返部單反，買 DC 仔，當然係想輕巧，方便攜帶為主啦~

就係咁，就決定買 Canon PowerShot G7 X 喇，有 1.8 大光圈，焦距有 18 - 100，仲可以反 mon 玩自拍，最重要係對焦快~

二零一五年二月十一日     星期三

今晚放工後，就返了公公婆婆家，一齊出去食團年飯~

點完菜之後，又未有嘢食住，所以就同彤彤玩下自拍先~

彤彤真係好鍾意玩自拍的，次次係手機度見到自己個樣，就會係咁笑，又會攏唔到嘅 pose~

二零一五年一月三日      星期六

今日見幾好天氣，而且又暖返少少，所以就打算去工展會行下~

等 lift 時，見彤彤心情幾好，所以影下佢先，he he.....

二零一四年八月十六日     星期六

我哋到達會展，都差唔多 6:30PM 了，由於帶住彤彤的關係，我哋可以行特別通道，唔駛遊花園，好快就入到會場了~

由於六點後係夜場，可以用優惠價 $10 入場，所以都好多人入咗來，頭果幾行直情迫到行唔到咁呀!!! 亦都因為咁，太迫的檔口，我哋都無行埋去，費事迫到彤彤~

我哋好快手，係 3 個半鐘內行晒幾個場，仲買咗好多嘢添~

Food Expo 2014 戰利品：
澤合白咖啡 5 袋送手推車 ($220)
益力多 $10 一排，加 $25 換購一部飛機仔
泰國椰青水 6 包 ($25)
惠康 $100 任揀 5 件，揀咗 2 包威化餅同 3 罐午餐肉
台灣芋頭酥一盒 ($62)

二零一四年六月十一日     星期三

今晚同公公婆婆食飯後回家，原先想執一執個櫃入面 d 物品的擺位，點知唔小心撞咗埋櫃角，撞正左眼眼肚位置，由於向前仆的關係，所以係由撞到果個位向上衝，岩岩去到鼻樑果邊的眼角，所受嘅傷猶如隻眼比人打了一拳一樣~

撞到後，老公望一望，見到我眼肚果個位有少少損咗，同埋瘀咗一撻，仲有就係我隻左眼係咁流眼水，但我明明無撞到隻眼嫁 wor? 真係奇怪!!

老公二話不說就話去法國醫院睇夜診，所以執咗彤彤小小出街用的物品，就苟樓搭的士去法國醫院了~

登記後，姑娘先幫我洗傷口，同埋幫我加了一塊紗布係左眼遮住 d 光線，應該唔會流眼水流得咁勁~

二零一四年五月廿四日     星期六

原先傢俬鋪話今日下午 6 點送新果 2 個櫃來的，但等到成 6:30 pm 都未有電話，我哋就打電話去問下，先知原來架貨車仲未過到關，要遲少少先送到來，結果差唔多 8:10PM 先送到來，師傅就砌咗成個鐘，差唔多 9:00PM 先砌好果 2 個櫃~

之後我哋就要清潔一下果 2 個櫃，可能呢排落咗成個星期雨，果櫃入面有好多 C 咗的飛蟻同埋飛蟻翼，同埋都幾大陣油漆味~

清潔完後，我就先去沖涼，老公就去接彤彤返來，之後幫手睇住彤彤，而我就將地上一袋袋的物品放返入櫃入面，老公就 2 點幾瞓咗，彤彤就 3 點幾先瞓，而我就執到 5 點幾先去瞓~

第二朝 10 點幾，彤彤就整醒我，唯有餵奶同換片先，之後再執埋剩返嘅嘢，一執就執到下午 5 點先攪掂晒~

臨近新年，各大百貨公司 / 店鋪都減價，所以我都趁呢個時候，買定彤彤出年冬天嘅衫~

雖然明知明天 (24 Jan 2014) Aeon 仲有多個 8 折，但今晚 (23 Jan 2014) 行過時只係得返呢幾件 90/100碼，仲要只係$15 一件，所以即使貴少少都照買，費事明天賣晒~ 

 

下面呢件响 Aeon 買的，折完後 $44.8 一件，超底呀!~

之前係團購買咗許留山嘅賀年糕點，$148 有年糕、蘿蔔糕及芋頭糕各一底，雖然係團購，但都好大盒，好有份量的，真係好底呀!~

二零一四年一月四日     星期六

係 Piggy Ducky Studio 揀完相，我哋見無乜嘢做，就行咗去工展會~

可能而家到展期嘅尾聲，所以即使係星期六，都唔算好多人，只係個別檔位比較多人，都算行得幾舒服~

二零一三年十二月廿八日     星期六

今晚見早早地已回家，所以就同焗爐試下整煨蓄著，估唔到要焗一個鐘先可以熟透，仲以為半個鐘就得添~

焗好後，就要放涼一陣，之後就除去 d 皮，d 蓄著好甜呀，彤彤仲一個人食咗半條，仲想再食，不過我驚佢太飽，所以唔比佢再食~

二零一三年十二月廿六日     星期四

今日九點半就醒了，於是早點出門，去會展嘅冬日購物節 (因為有免費飛)，我哋食埋早餐，大約 12 點半就入到場內了~

今年唔算太多人，可能我哋早入場嘅關係，所以都叫行得幾舒服，但 d 嘢唔係好平，所以我哋都無乜收穫，只係買咗 d 小食即時食~

行到 4 點度，我哋就離開，去咗 PizzaHut 食嘢，點知今日無得叫 tea set，都算啦，照食~

二零一三年十二月廿四日     星期二

原先今日我係可以提早 2 小時放工的，但由於太多嘢要做，所以我都係好似平時果個鐘數先走~

而老公公司今年無得放早，佢又係好多嘢要趕係假期前完成，所以佢都攪到成7 點先放工~

返埋今日，就可以一連放 5 日假期陪彤彤了~ (因為我哋 27/12 果日放埋假)

由於今年唔想同人迫，所以今年選擇唔出街，只係响屋企附近嘅酒樓打邊爐，因為天氣太凍了，要食返 d 熱嘢暖下身~

二零一三年十二月十四日     星期六

由於我嘅嫲嫲係上月中去世，所以今日同明天就要做法事~

因為彤彤年紀小，所以我哋唔會帶佢出席，唯有將彤彤交比老爺奶奶照顧，彤彤仲同佢哋玩得好開心添~

於是我同老公就過去大酒店，點知到咗 7 點幾，奶奶打電話比我，話彤彤扭眼瞓，已經喊咗成個幾鐘，叫我哋快 d 返去接佢~

同老公商議後，打算老公返去接彤彤，我就繼續留係度，點知我父母知道後反對，叫我都要一齊返去接返彤彤，話彤彤呢個時候梗係想要痴住 Daddy & Mami 的，所以我哋即刻搭的士去老爺奶奶家，接彤彤回家~

二零一三年十二月一日     星期日

同彤彤參加完爬行比賽，我哋就過咗去 Megabox，睇下何潤東個簽名會完咗未，估唔到仲未完 (即係佢簽咗成 2 個鐘了)，我就即時迫埋去睇下可唔可以影到佢相，因為我真係好鍾意睇佢做嘅台劇嫁~

何潤東真人比上鏡更靚仔，更加 Man，又好高大，仲好 nice 添~

二零一三年十月五日     星期六

咁岩行過金鐘廊，見到有 jetso 嘢，就係用 $85 就可以買到價值 $158 的東海堂 coupon~

見到咁低，我哋買咗 6 包，4 包自用，另外 2 包送比奶奶~

後記：好彩我哋買得快，我哋買果日係任買的，仲要有好多存貨，後來多咗人知，金鐘廊果邊就限時供應，每日只賣60 包，仲要限住每人只可買 2 包~

二零一三年九月十八日     星期三

今日同我父母食飯做節，我返咗去我父母家先，老公放工後就去搵位，有位我哋先出門口，今次揀咗去海港食~

阿爸話今日阿姨來過，仲拎咗幾盒月餅來，所以阿爸叫我拎一盒回家食，佢先我鍾意食奶黃月餅，所以叫我咗半島回家食，ha ha.....

大約 7:30pm 度，老公就打電話來話有叫，我哋帶埋彤彤一齊去會合老公，今次叫咗一個優惠餐，再另加 3 樣餸，埋單都係 $660，都算幾低食!~

岩岩過去咗果個 weekend，數字屋有會員 7 折優惠，所以我哋都去掃咗 d 貨~

二零一三年九月二日     星期一

今晚同老公食完晚飯，去咗超市行一陣，我哋將彤彤放落去購物車度坐，佢坐咗落去後，好似好奇咁四圍望/摸~

二零一三年八月十七日     星期六

其實今日都唔想去美食展的，因為彤彤仲細，好驚入到去多人會迫親佢，但老公又想去行下，而我又想入去買榴槤月餅，所以都係去咗，ha ha.....

因為帶埋彤彤嘅關係，我哋唔駛係外圍打圈，可以由特別通道入場，所以好快就入到場了~

我哋先行 3 樓，嘩....... 勁多人，D 路又窄，所以都幾難行，我哋都無乜心機買嘢，之後落返去 1 樓行~