Sharon & Victor & Tung Tung 幸福之家

二零一五年七月十五日     星期三

話咁快，彤彤就 PN 班畢業了，今日係 PN 班的 last day 喇!~

回想返上年 10 月的時候，仲好擔心無學校收彤彤讀 PN 班 (因為細 B 的關係)，到彤彤 2 歲生日前幾日 (11 月頭) 先搵到間學校收佢，仲要係一語境唔錯的學校添~ 係呢間學校，其實返得幾好，可惜真係太遠，公公辛苦時(公公負責接送)，彤彤亦都辛苦，所以當時已經打算 K1 時會轉校~

估唔到今年 1 月頭的時間，竟然收到 call waiting 嘅電話，係屋企附近的幼兒園打嚟，話 PN 班有位，可以比彤彤係下學期插班，由於呢間係心儀幼稚園之一 (可惜彤彤考 K1 當日因為眼瞓唔多合作，只係 waiting offer)，所以即時 take 呢個 offer (但讀開果間學枚要賠返一個月學費，加上新學校又要買過晒 d 校服，前前後後都駛多成 6k)，當時無諗過原來讀呢間學校嘅 PN 班 (即使係插班生)，都可以優先升上 K1，一心諗住讀開嘅話，求位時會易 d 掛~

係我回覆學校後，老師才透露給我知，如果老師評估過無乜大問題，都可以優先升上 K1~

二零一五年七月十三日 星期一

今日係彤彤 PN 班嘅結業禮，所有小朋友的家長都受邀出席。

雖然結業禮非常簡短，只有45分鐘 (因為今日整個下午，有 3 場結業禮舉行)，但原來小朋友們排練了 3 首歌，來表演給家長們睇。 細聽之下，先知道原來係近排彤彤成日唱的歌，都有成個月的事了，原來小朋友為咗呢次表演，已經練咗成個月，彤彤仲要唱的好投入，又跟歌詞做岩晒動作~

二零一五年六月十九日 星期五

今日彤彤放學返嚟，手上多咗樣嘢，原來係學校嘅老師，教小朋友做咗份禮物嚟送比爸爸，作為父親節禮物~

老公返嚟見到彤彤拎住份禮物送比佢，彤彤仲話：「我自己做嫁」，不知幾開心~

二零一五年五月廿二日     星期五

今日係彤彤的 PN 班下學期嘅家長日，我同老公依時到達學校 (通告講明不要帶埋小朋友出席)，由於上一位家長仲未見完，所以我哋就係小禮堂睇下 PN 班日常上堂時嘅片段先，都見到幾張相係有彤彤係度的~

睇咗一陣，班主任王老師就出嚟叫我哋入課室，同我哋講返彤彤平時上堂的情況~

王老師話彤彤好鍾意上唱遊堂，音樂一起就會拍晒手掌，仲都好主動出嚟跟音樂做動作~

另外，王老師話彤彤已經識得返學時自己放書包上架上，初初開學時，係唔肯做的，老師教佢做，仲會喊晒口添，而家已經有明顯嘅進步；另外就係食嘢方面，比初初開學時已經好咗好多，但仍有進步空間，同埋彤彤比較心急，次次都大大匙咁"筆"上嚟食，好容易食到成面都係，王老師叫我哋在家多點訓練佢~

二零一五年五月八日     星期五

今晚放工後，返去公公婆婆家接彤彤，我一入門口，彤彤就拎住佢親手做的母親節小手工比我，應該係學校老師同佢一齊做的，第一次收母親節禮物，真係心都甜晒~

二零一五年四月廿日     星期一

今日起床時，有點唔舒服，所以請了假，老公就帶彤彤過去公公婆婆家，而我就繼續係屋企瞓下先~

瞓到差唔多 12 點先起身，原先諗住下午去返工的，但仍然覺得有點頭赤赤，所以就放埋下午~

食飽飯，又再瞓多陣，就同公公一齊去接彤彤放學，彤彤見到係我嚟接放學勁開心，回到公公婆婆家仲係好開心咁跳舞，睇嚟我要多 d 去接下放學先得！~

二零一五年三月十三日     星期五

彤彤轉咗新學校無耐，就收到通告，將會係 3 月份有親子旅行，我哋當然係會參加啦~

2 大人 1 小朋友，承惠 $550 ，其實都有點貴，但我哋都想陪下彤彤玩下，貴都無法啦~

早上 8:45 準時返到學校，先係課室內等齊人先，呢個時間，好多家長都拎相機出來影相，當然我哋都有影埋一份啦~

二零一五年二月十六日     星期一

今日阿囡學校舉行年宵花市，小朋友今日要穿中國服 / 便服回校。

由高年級生帶住低年級生行年宵花市，同埋參與唔同嘅遊戲活動，當然唔少得老師從旁協助啦~

每樣遊戲活動都需要比唔同嘅錢先可以參與，小朋友可以值住參與活動，認識金錢嘅概念~

參與完活動，仲有小手工拎回家添，睇嚟應該幾好玩，可惜家長未能參與其中~

二零一五年二月七日      星期六

今朝老公自己一個返去彤彤舊學校，拎返彤彤「上學期成長記錄光碟」，同埋校內評估成績表~

原先應該上星期有家長會的，但由於我哋已經退學，所以就無出席家長會，改為拎校內評估成績表就算~

其實彤彤校內表現都叫做 OK, 大部份都係 2 or 3，雖然無任何一樣係 1，但至少唔係有好多個 4 啦，只係得一項係 4，就係用中文表達需要，不過呢項都 expected 的，因為彤彤不嬲講中文麻麻，佢鍾意學/講英文多~

二零一五年二月六日     星期五

彤彤返咗新學校已經一星期了，雖然暫時每日只係返 1 個鐘，但總算好適應新學校，上堂時無喊過，叻叻!~

今日放學，老師放咗本手冊入彤彤書包，原來每個星期都有評估進度表嫁，彤彤表現都唔錯，要繼續加油呀!~

除咗手冊，仲有嚟緊一個月會教嘅課程，透明度好高呢~

二零一五年二月四日     星期三

今朝先返工做半日嘢，下午放假陪彤彤返學，所以 Lunch Time 一夠鐘就趕返藍田港鐵站接彤彤~

點知有少少塞車，攪到我好遲先接到彤彤，之後耍抱住彤彤急步行返學校，好彩我哋岩岩趕得切，老師岩岩開門出來接我哋，好險呀!~

今日係第三日陪彤彤返新學校，今日彤彤已經熟悉咗新學校，開始有少少坐唔定；亦開始對老師問嘅問題有反應，老師唔係問佢嘢，佢都自己係度講嘢；放學時，我都未問佢返學開唔開心，佢已經主動同我講開心呀！~

今日老稀送咗包餅餅比彤彤，放學後，彤彤一直拎住，唔捨得放手，ha ha....

二零一五年二月三日     星期二

今朝先返工做半日嘢，下午放假陪彤彤返學，所以 Lunch Time 一夠鐘就趕返藍田港鐵站接彤彤~

之後就拖住彤彤慢慢行返學校，我哋早咗 5 分鐘到達，彤彤好心急想入去，但未夠鐘，老師唔比入住，唯有陪佢行下門口嘅樓梯啦~

今日另外 2 位插班生都有返學喇，所以我哋今日又要聽多次新生簡介 (尋日已經有老師講了一次給我哋聽)，唔緊要啦，聽多次清楚 d 嘛~

今日係返新學校第二日，開始識跟老師指示做動作；可以全程坐定定；亦知道無音樂唔可以拎起樂器，聽到音樂先拎起嚟搖(第一日老師教過)；出 Playground 做體操，見到隔離有滑梯，都無話要去玩，留係度跟老師一齊做體操，希望可以繼續進步啦！~

二零一五年二月二日      星期一

今日特登請假，陪彤彤返新學校，但早上起床時，已經 feel 到有點唔舒服，所以叫老公帶彤彤過去公公婆婆家先，我再去睇醫生，之後再帶彤彤返學~

我睇完醫生回來，公公婆婆已經幫彤彤換好校服，彤彤已經急不及待，係屋內行來行去，等我回來帶佢返學~

二零一五年一月三十日     星期五

今日係 PN 上學期嘅最後一日，亦係 1 月份生日會，所以可以著便服，而且今日亦係彤彤返呢間學校嘅最後一日，下星期一就會返新學校喇!~

所以今日我就同公公一齊去接彤彤放學，順便睇下有無乜嘢手續要攪埋~

彤彤見到我同公公一齊來接佢放學，不知幾開心，係咁叫媽咪~

之後我行入課室，問下老師有無手續要攪嘅時候，彤彤見我行開咗，就即時喊 (公公事後話返我知的)，老師都有再問下點解唔讀，我都係輕輕帶過，話彤彤抵抗力弱，老人家唔想佢咁細個返學等等嘅原因先唔讀~

二零一四年十二月十九日      星期五

今日特登請了假，陪彤彤返學校開 X'mas Party，但由於學校將上下午班 group 埋一齊攪 Party，所以今日我哋 8:30AM 就出門口~

先去買一個蛋糕 (因為要家長自備一樣食物 - 6 人份量，買蛋糕係方便拎)，之後就去搭巴士返學校，返到去岩岩好 10:00AM~

二零一四年十一月十一日至十四日     星期二至五

其實呢幾日都係老公帶彤彤返學，上堂嘅模式同之前一樣，不過我哋發現彤彤真係坐唔定，其他同學仔雖然有時都會行來行去，但其實大部份時間都係坐定定的，而彤彤就相反，成日行來行去，好少時間係坐定定~

另一個問題就係自理能力真係好弱，唔識自己拎水杯飲水，唔識用叉/匙食嘢，呢 d 其他同學仔大部份都識晒了，真係要靠學校多 d train 下佢先 (因為公公婆婆成日都話唔駛咁快識啦，仲咁細個，所以佢哋唔肯配合啦)

二零一四年十一月十日     星期一

今日係彤彤第三日返學，我特登請了半日假來陪彤彤上堂，由於我哋早咗少少到，所以就先入遊戲室玩下先，等夠鐘先行返過去班房上堂~

二零一四年十一月六日     星期四

今日又係由老公陪彤彤返學，其實每日返學的安排都係差唔多，先上中文堂，之後就係茶點時間，然後就上英文堂，最後就係玩耍時間~

由於今日有少少兩，所以小朋友唔可以出去 Playground 玩，改咗去遊戲室玩~

二零一四年十一月五日     星期三

雖然彤彤仲有幾日先夠 2 歲，但由今日開始，就展開咗多采多姿嘅校園生活喇!~

Daddy & Mami 希望你會鍾意返學，對讀書有興趣，做個品學兼優嘅小朋友~

由於彤彤未夠 2 歲，唔可以自己上堂，所以我哋會陪佢上 2 星期堂，之後就要自己上堂喇!~

由於老公仲未搵到工，所以呢 2 星期就辛苦佢喇，由佢帶住彤彤一齊上堂!~

二零一四年十一月三日      星期一

一直都心大心細，比唔比彤彤返 N 班好? 平時公公婆婆可能真係照顧得彤彤太好，樣樣嘢唔駛點出聲，就有人幫佢安排/處理好，所以佢唔太肯開口講嘢，呢排仲要成日發脾氣，同老公傾過都係覺得比彤彤返下學好 d~ 但彤彤係龍細 B 嘅關係，真係好難先搵到學校有 N 班位比彤彤插班 lor~  (我已經打晒電話去藍田至九龍灣嘅學校問過)

同朋友傾開，煩惱緊搵唔到有學校仲有位插班之際，朋友仔話佢囝囝學校因為係新校嘅關係，再加上地點比較吊腳，應該仲有位，叫我試下打電話去問下~

電話問了學校，話而家仲有位，大致上應該無問題，叫我哋帶埋彤彤過來見一見校長，由校長決定收唔收彤彤~

今日 4:15pm 就來到學校，係教員室等見校長，大約等到 4:45pm 就可以去課室參觀，之後就入課室見校長~