Sharon & Victor & Tung Tung 幸福之家

二零一五年五月九日     星期六

正當以為 K1 大作戰，已經隨住第二心儀幼稚園收咗彤彤，又交晒一齊註冊費用及上學期嘅雜費，而圓滿結束嘅時候。 今日收到一封由最心儀嘅幼稚園寄嚟嘅信，令心中又再次泛起了漣漪，呢間學校不單是收了彤彤讀 K1, 仲要 offer 咗一個上午班嘅位比彤彤，呢次真的頭痛了~

但老公經過 2 日嘅討論，都係決定放棄呢個 offer，因為彤彤已經適應咗而家呢間學校，而且每日返學都好開心；另一原因係，註冊費用、上學期嘅雜費同校服，前前後後都差唔多成萬蚊，咁樣轉一轉，又要再洗多筆錢，而且新學校果邊嘅雜費都幾貴下，仲要坐校車添，計落洗費大咗好多；第三方面，雖然新學校學術一定好勁，但佢只係收彤彤讀本地班，唔係國際班，所以唔係最勁果隻，可能比普通學校勁小小，但其實而家讀緊果間，學術都應該幾好，所以左計又計，都係留返係而家果間好 d~

二零一五年一月廿四日     星期六

今年 K1 有新玩法，學卷學校要係 22 - 24/1 統一註冊，由於嚟緊彤彤會插班果間學校未 confirm 到有無位比彤彤升 K1 (無學卷的)，所以我哋都決定要去一間學卷學校註冊咗先~

今朝一早，我就自己一個人，拎坐彤彤張學卷，取錄信，同埋一個回郵信封，去到學校排隊註冊，同埋交 $970 的留位費~

成個過程好順利，大約半個鐘就完成。

二零一五年一月六日     星期二

今日實在太開心，因為收到心儀學校 call waiting 嘅電話，雖然唔係 K1 位，只係 N 班插班位(因為上年考 N 時，彤彤都係後補生，估唔到過咗一個學期後先 call waiting)，但再問清楚後，原來只要插班後，老師覺得無大問題，一般都可以直升 K1，唔需要再排 K1 條 waiting 隊，所以諗咗一陣，就決定 take 呢個 offer，估唔到彤彤係細 B，N 班已經比人遲入學，竟然仲要玩埋轉校~

而家讀緊 N 班果間幼稚園，彤彤會讀埋 1 月份，但 2 月份嘅學費同埋雜費都要照比，因為退學要一個月前通知。而 2 月份就會係新學校插班下學期，希望彤彤順利過到 2 月尾嘅評估，可以直升上 K1啦~

經過辛苦嘅 11月，不停出席唔同嘅幼稚園面試，踏入 12 月就陸續收到面試結果，做一個總結先:

申請幼稚園: 23 間

出席面試: 15 間

取錄: 2 間 (都係下午班)

後補生: 9 間

不被取錄: 4 間

雖然最心儀果 2 間學校，無取錄彤彤，只得後補生，但只要唔係 reject letter 都叫做仲有希望，所以我都有寫到求位信去呢 2 間學校。

二零一四年十二月六日      星期六

成個 11 月嘅星期六，都係去面試，踏入 12 月嘅第一個星期六，終於都嚟到最後一站喇~

今朝天氣好凍呀，但我哋要去面試，所以要頂硬上~

二零一四年十一月廿九日      星期六

今日好輕鬆，只係需要見一間幼稚園，而且仲要係下午先見，所以我哋唔駛一早就起床，慢慢先搭車出去都得~

我哋早咗 15 分鐘嚟到，先係門外排隊交 Form 同報到，而係排隊等交 form 期間，我聽到校長係度罵學校嘅嬸嬸，話佢應該要嚟面試嘅小朋友，先掉咗手上嘅汽球先好入來 (因為隔離間教學中心係條街度派緊汽球)，唔係會影響一陣面試嘅流程 (因為面試最後一 part 會派汽球)，個嬸嬸有點無奈，而我聽到後，都覺得嬸嬸好慘，無啦啦比人罵，佢都唔知隔離間教學中心係條街度派緊汽球嫁，同埋覺得校長有點惡 lor~

交完 Form 同報到之後，我哋就帶埋彤彤去 Outdoor Playground 玩住等~

二零一四年十一月廿二日      星期六

返完 Playgroup 之後，我哋又要搭車出返來九龍塘，因為下午仲有一個面試要出席 -- 香港創價幼稚園，聞說連劉德華都有幫佢嘅囡囡報了呢間幼稚園，仲被安排係星期四果日面試，而劉生仲親自帶囡囡出席面試添~

呢間幼稚園有乜好? 一來有學卷，兩來辨學團體係日本嘅佛教團體，教育小朋友好似日本小朋友咁乖巧，仲會訓練/啟發小朋友嘅思考同創作力，所以每年都有幾千人報讀，但學位只得 180 個，所以競爭都好大，當比彤彤見識下 lor~

入到去，先去指定嘅課室門外報到，但由於我哋早了半個鐘來到，老師都預唔到仲有幾多先到我哋(因為要見到前面時段嘅申請人先)，所以叫我哋先上樓上 Playground 玩下先，到 4:30PM 再落來睇下仲有幾多人先到我哋~

二零一四年十一月廿二日      星期六

今日又要去見 2 間幼稚園，彤彤今朝起床後心情好靚，係咁捉住我陪佢跳舞，又成日笑笑口咁~

二零一四年十一月十五日     星期六

今日嘅第二站係响油塘，呢間係一間分校來的 -- 基督教中心幼稚園 (油塘)，總校係九龍塘，係一間幾出名嘅學卷學校，而油塘呢間分校，只係開了 2 年嘅時間，所有嘢都好新淨嫁~

初初唔知學校嘅確實位置，有少少難搵，仲行多咗好多路，後來再周圍行下，先知原來係商場嘅平台上，再跟指示行，先知原來係我姨屋企樓下~

入到去先報到，跟住就可以係 Playground 度玩，等候老師叫名入課室面試，估唔到好多人係度等緊~

個 Playground 係室內的，好大好多嘢玩，所以就算等咗差唔多 45 分鐘先可以入去面試，都唔算好悶，彤彤仲玩得好開心添~

二零一四年十一月十五日     星期六

今日又係星期六，又係面試日喇，今朝有 2 個面試要出席，之後就再返 Playgroup~

今朝出門口時有少少阻滯，所以旔咗 5 分鐘先到達 - 藍田靈糧堂幼稚園，好彩都比我哋入~

去到學校先係報到，再等叫名入等候課室，之後就係課室度玩玩具~

大約等咗 15 分鐘度，就有老師叫彤彤出去拎 Label，再玩多 5 分鐘度，就可以排隊去面試嘅課室，原先有 10 位小朋友的，暫時要分為 2 組，分別去唔同嘅課室面試~

二零一四年十一月八日     星期六

食完 Lunch 後，我哋就來到北角，去出席今日的第四場面試 -- 北角明慧國際幼稚園，呢間學校嘅語境好好，除咗英普之外，仲會教埋日文添，所以我哋都好鍾意~

面試先由唱遊開始，全個課室內有40 位小朋友，同 2 位外籍老師一齊唱歌跳舞，其實唱嘅歌都係平時返 Playgroup 唱果 d ，我仲諗住彤彤一定會跟住來跳舞添，點知佢竟然無一齊跳，只係企係度睇其他人跳@@

之後就安排小朋友入唔同嘅課室進行面試，每 3 位小朋友一組同 1 位老師見面，好唔好彩，同組嘅小朋友係大 B，講嘢有文有路，睇來彤彤都係陪跑的了~

老師先同 3 位小朋友 Say Hello，3 位小朋友都有同老師揮手，之後問小朋友叫乜名同幾多歲，除咗彤彤之外，另外 2 位小朋友都答到@@

二零一四年十一月八日     星期六

見完協恩，一出門口就截到的士，即刻趕去下一站 - 鑽石山靈糧堂幼稚園，好彩趕到過去仲有 5 分鐘剩~

去到先登記，之後就有職員幫我哋貼上 Label，再帶我哋去等候室，先係等候室玩玩具，裡面有 1X 位小朋友同 2 位老師，唔知有無計緊分，我哋只係專心同彤彤係度玩，同埋控制住佢唔好四圍走~

大約玩咗 20 分鐘度，老師就叫所有小朋友出來，跟 Label 上的編號排隊，由老師帶去大肌肉活動區自行玩耍，有一位老師全程跟住我哋玩，點知彤彤玩玩下嘅時候竟然跌咗條片片落地下 (呢排彤彤唔鍾意著片片，成日自己伸手入去除咗條片，但佢又未戒到片，真係激 c)，果時真係勁 fish lor!~ 不過老師都好好人，即時帶我哋去洗手間，再係洗手間門口等埋我幫彤彤包返好張片片，然後再帶我哋返去面試 (但由於要包片片的關係，變相我哋比其他人的面試同觀察時間小咗)，老師叫彤彤推一間大車車比佢，彤彤有做到。再叫彤彤推住架車沿住地下嘅跑道來行，彤彤係我扶助下，都可以做到~

之後就去 Sir 滑梯果邊，睇下彤彤嘅大肌肉發展成點~

二零一四年十一月八日     星期六

等咗 10 分鐘終於都截到的士，點知去到下一間學校附近竟然塞車，真係激 c !!!

到達下一站 -- 協恩中學附屬幼稚園，已經比原定時間遲了 10 分鐘，仲落住毛毛細雨，落車的位置同學校的入口有一小後距離，唯有抱住彤彤快步行過去，好彩學校都比我哋入~

報名呢間學校，真係有少少越級挑戰，因為幾千人報名，只係收 60 人咋，仲要係小朋友獨自入課室面試，家長唔可以陪，所以我當係比彤彤去見識下，無抱住任何希望~

先去排隊拎籌，之後就排隊等帶到面試嘅課室門口，再係課室門口等入去，門口有義工家長同等候嘅小朋友唱歌，等小朋友唔好咁緊張~

二零一四年十一月八日     星期六

又到星期六，又係幼稚園面試嘅日子~ 原先今日收到 7 間幼稚園嘅面試通知書的，但因為撞期，所以只能出席其中四間，連我自己最心儀嗁劍鳴幼稚園都出席唔到~ (考慮到機會太小，唯有揀去見村校，希望可以增加成功嘅機會)

其實前晚彤彤有少少發燒(只係返了 2 日學就病到，真係無用豬呢~)，我哋第二朝見佢退咗燒都照帶佢去睇醫生，退燒後都無再燒返，但安全起見，我哋都唔比佢返學(彤彤到中午時仲自己拎住對白波鞋行出門口，想去返學添~)，等佢休息一日，可以出席星期六嘅面試~

今朝一早，9:20AM 就要出席第一間幼稚園嘅面試 -- 佛教金麗幼稚園，呢間幼稚園係屋企附近；學校無 N 班，所以比較多位；雖然係學卷學校，但好多報導都話呢間幼稚園係隱世名校/學卷學校中嘅名校(簡介會時校長都係咁講)；最重要係我細個時都係讀呢間，應該會優先考慮收返彤彤(如果面試表現 OK 嘅話)，所以我寧願放棄劍鳴，都要帶彤彤來呢間出席面試~

我哋準時就到達，但只能一位家長陪同出席面試，所以就由我陪彤彤入去，面試先由 6 位小朋友一組 (但有一位小朋友無出席)，一齊入課室，睇一段唱遊嘅片段，再同老師一齊唱下歌，做下動作跳舞，彤彤跳得唔太投入(可能仲未瞓夠嘅關係)，但都有耐唔時跳幾下 / 指下手咁~

二零一四年十一月二日     星期日

今日一早，我哋就起身準備了，之後到差唔多時間，就叫彤彤起身飲奶。點解要咁早起身? 因為今日又要去幼稚園嘅面試，無錯星期日都要去面試!~

準時去到學校門口 (無錯唔駛搭車，因為係屋企樓下咋)，但未可以入去住，所以就係門口等下先~

原來今日除咗係面試日外，仲係學校嘅的開放日呀，所以學校都悉心佈置咗一番~

二零一四年十一月一日      星期六

由藍田搭港鐵去到九龍塘，只係 3:05PM ，諗住大把時間剩啦(我哋見 3:30PM)，點知截咗成 15 分鐘先有的士，上咗的士又玩塞車，攪到我哋遲咗 10 分鐘，先到達今日的第四站 - 又一村學校，好彩老師都比我哋入去，我仲見到好多人都遲到，梗係啦，九龍塘大塞車~

先去校務處拎籌號，我哋係今日的第 1018 位 (Oh..... 一日都一千人有多，仲有 2 日未 in 嫁 wor，咪即係成 3 千幾人爭 4XX 幾個位?!)，之後就去一間課室門外排隊，等候老師核對小朋友的出生文件~

之後我同彤彤就去等候區等叫籌號面試，老公就去另一間房聽學校簡介~

二零一四年十一月一日     星期六

老公 1:30PM 就來到公公婆婆家中，同我哋一齊出發去今日的第三站 - 平田救世軍幼稚園~

我哋早了 10 分鐘到達，所以先在門口等下，玩下車車先~

二零一四年十一月一日     星期六

雖然今日的第一間幼稚園面試以失敗告終，但唔緊要，因為今日仲有 3 個機會比彤彤再試!~

由麗港城等巴士，到出到來九龍灣，足足用咗 50 分鐘，因為只係等車都等咗 25 分鐘了@@ (好彩 2 間幼稚園之間的時間都算充裕)

來到德福，彤彤都仲未瞓醒，我哋先叫醒彤彤，再同佢傾下計，行下花園仔先，等佢醒神返 d 先，之後就行去德福幼稚園，仲未夠鐘，所以要係室內操場坐一陣等下先，再貼上學校提供的 Label，等候入課室面試~

二零一四年十一月一日     星期六

千呼萬喚，終於都來到 K1 作戰的大日子了，前前後後幫彤彤幫了 2X 間幼稚園，村校又有，誇區都有，當然唔少得名幼。

亦都差唔多收晒各間幼稚園的面試通知書，結果 d 面試時間撞到七彩，慶幸我補咗咁多間，叫做多 d 選擇比自己 lor~

彤彤尋晚好乖，12點前已經自動自覺瞓了，唔通知道有幾場大戰等住佢來應付?!

今朝八點半，我就叫醒彤彤，之後就一齊過公公婆婆家中，因為今朝老公要去考筆試，所以今朝早上的面試，我哋會同埋公公一齊去~