K1 大作戰 Round 4 - 又一村學校－Sharon & Victor & Tung Tung 幸福之家

二零一四年十一月一日星期六

由藍田搭港鐵去到九龍塘，只係 3:05PM ，諗住大把時間剩啦(我哋見 3:30PM)，點知截咗成 15 分鐘先有的士，上咗的士又玩塞車，攪到我哋遲咗 10 分鐘，先到達今日的第四站 - 又一村學校，好彩老師都比我哋入去，我仲見到好多人都遲到，梗係啦，九龍塘大塞車~

先去校務處拎籌號，我哋係今日的第 1018 位 (Oh..... 一日都一千人有多，仲有 2 日未 in 嫁 wor，咪即係成 3 千幾人爭 4XX 幾個位?!)，之後就去一間課室門外排隊，等候老師核對小朋友的出生文件~

之後我同彤彤就去等候區等叫籌號面試，老公就去另一間房聽學校簡介~

係課室等了 20 分鐘度，老師就叫我哋上一層再等叫名，之後再等多 10 分鐘度，就輪到我哋入課室喇!~

先係 1 號課室門外等齊人先，彤彤見到老師，主動同老師揮手打招呼，而彤彤同組的另一位小女孩，就開始驚到喊，唔肯老師打招呼，唔肯行入課室，所以老師叫小女孩的媽咪抱住佢入課室先~

入到課室，小女孩無再喊了，但就唔肯自己坐，要佢媽咪抱住，彤彤就成日想離開坐位四圍走~

之後老師先問小朋友叫乜嘢名? 幾多歲，但 2 位小朋友都無出聲，之後老師就拎咗個波波出來，推比彤彤，叫彤彤推返比佢，彤彤有照做，但另一位小朋友就無做到~

之後老師問 2 位小朋友，波波上面邊度係紅色 (個波有 2 隻色，分別係紅色同黃色)，2 位小朋友都無指出來~

老師話唔緊要啦，我哋玩另一樣，就拎咗一架巴士，一架小巴，同埋一架的士出來，問 2 位小朋友，頭先搭乜車來呀? 彤彤衫衫拎住架小巴來玩的 (因為部小巴個門可以開閂的，彤彤好 enjoy 玩個門口位)，但佢聽到老師問佢搭乜車來，佢就放低部小巴，拎咗部的士上手玩，老師再問佢係乜來架，彤彤無出聲，老師問頭先係唔係坐的士嚟呀，彤彤無答，只係自己係度玩架的士。老師再問彤彤，的士係乜嘢色呀? 彤彤無出聲~ 老師就轉去問另一位小朋友，果位小朋友都無答，呢個時候，彤彤可能覺得悶 (因為老師唔係問緊佢嘢)，所以就離開座位四圍行，要我起身拖住佢返來坐@@

老師拎咗 2 sets 海綿積木出來比 2 位小朋友，先比彤彤玩第一 set，要將一條圓柱體嘅海綿積木，插入一個四方形中間有一個圓型的空位度，彤彤好快手就插了入去，老師叫彤彤拔返條圓柱體出來，但 2 舊海綿積木啜得太實，佢用晒 2 隻手都拎唔到出來，所以老師就幫佢拎住四方形果舊，叫彤彤再試多次，呢次彤彤就拎到出來喇，佢仲扮埋聲 "e....也....." 咁添，真係以為佢要用盡全身嘅力量先拎到出來咁，ha ha.....

之後就交換來玩，另一 set 海綿積木有幾舊唔同形狀嘅積木，老師叫彤彤用方法疊高佢哋，彤彤都有照做，仲好就就疊好晒添，而另一位小朋友頭先玩呢 set 積木時，扭計唔肯做，到佢玩返插圓柱體果 set 積木時，佢媽咪氹咗佢一陣都肯做~

之後老師拎咗個 BB 公仔出來，叫 2 位小朋友同 BB Say Hello，2 位小朋友都有揮手~

老師問彤彤邊度係鼻? (我係彤彤隔壁提佢 Where is the nose?) 彤彤即刻掂一下公仔個鼻，老師再問彤彤耳仔係邊呀? (我又係彤彤隔壁提佢 Where is the ears?) 彤彤掂一掂公仔的右耳，老師話仲有一隻呢? 彤彤無做到，我再叫彤彤指埋另一邊，彤彤呢次有做到~ 老師再問另一位小朋友同樣的問題，但佢無理到老師~

之後老師拎咗 d 食物出來，問小朋友係乜嘢來，先拎麵包，彤彤即時話包包，再問香蕉同埋蘋果，彤彤就無出聲，另一位小朋友就只係識答香蕉~

跟住老師話今日面試完成，叫小朋友自己揀一樣禮物 (一個透明膠桶入面有紫菜同餅餅)，彤彤伸手入去拎了 3 塊餅餅，我同老師一齊話只可以拎一塊咋，其他果 d 放返入去，彤彤都有照做，叻叻!~

拎完禮物，老師問 2 位小朋友要講咩? 係我未出聲提彤彤之前，彤彤已經自己講多謝，叻叻~

之後就可以離開課室，臨走前我叫彤彤同老師 say goodbye，彤彤都有照做，但叫佢推埋張櫈，佢就唔肯做了~

出了課室，門外仲有其他老師係度，彤彤仲主動同佢哋 Say Goodbye~

之後我哋落返地下操場，同 Daddy 會合，再同 Daddy 講返彤彤的表現，我哋都認為彤彤嘅表現大致滿意，唔係完全無機會~

之後就可以係學校四圍參觀，當然唔少得比彤彤玩下啦，呢間學校真係好大好靚，好鍾意呢度，而且又有學卷，希望彤彤有緣可以入到來讀啦~