Sharon & Victor & Tung Tung 幸福之家

二零一三年七月六日     星期六


話說之前係 Groupon 見到 cwb 有間 Playgroup 做團購， $188 就有 3 堂，所以就當試堂咁買來比彤彤玩下~

呢間 Playgroup 叫 Kiddo Zone，我哋上到去，彤彤仲瞓緊教，Reception 位小姐就幫我哋登記，同埋介紹下今日個流程，佢幾 nice，又好禮貌，仲解釋得幾清楚添~

之後我哋就叫醒彤彤，準備上堂，彤彤比我整醒，有少少不滿咁喊咗幾聲，之後佢見到有其他BB係度等緊，果度有個 waiting area 又幾 colorful 咁，佢就開心返晒喇!~

過咗一陣，有位媽媽推住BB車入來，BB車上嘅BB有少少肥嘟嘟咁，彤彤一見到人家，仲係咁對住人哋係度笑，好似想識人咁，其他人仲話彤彤咁細個就想識男仔添@@

二零一三年七月五日     星期五

今晚放工後，如常地同老公返去我父母家接彤彤，見今日係星期五，所以我哋又過咗去油塘大本型行街食飯~

今晚等咗好耐先有小巴，等到無聊就影下彤彤，點解影出來，彤彤好似變身超級薩亞人咁嘅?! d頭髮又稀疏又豎起哂~ No good!~

之後過到去油糖，行咗一陣街，就去搵嘢食，原先諗住食十勝牛，點知好多人等位，之後我哋就轉去墾丁茶房，好彩等咗一陣就可以入去喇!~

入到去就叫嘢食，之後等食啦，就彤彤又發揮佢嘅好奇心同埋破壞能力，將枱上嘅餐紙全部變成癈紙，玩玩下仲丟埋落地下添，No good!~

講開飲水，彤彤係呢方面好有堅持的，就係用奶樽比佢飲水，佢係會拒絕的，因為佢認為奶樽只係用來飲奶的，唔應該用來飲水水~

開頭我哋都唔知的，仲苦惱緊唔通彤彤唔鍾意飲水，要飲甜嘅嘢先得?

後來我買咗隻學習杯比彤彤，諗住訓練佢學下自己拎住來飲奶，因為佢到而家都未識(定還是懶?)拎住個奶樽飲奶的~

第一次試用學習杯，因為未夠鐘飲奶，所以就用水來試下先，點知佢肯飲 wor, 仲聽到吸啜嘅聲，即係佢一試就已經識點用喇，叻叻!~

之後我哋又試下用BB匙餵佢飲水，佢又肯飲 wor，再試返奶樽，佢又唔肯，仲即時推開添，所以我哋知道，佢堅持奶樽只係用來飲奶的~

二零一三年七月三日     星期三

今日同老公都因為感冒，所以無返工，變相多咗一日假期同彤彤玩，但結果我哋三個掛住瞓教多 d lor~

瞓咗成日，到咗晚上個人先精神好 d，先可以同彤彤玩下~

今晚如常係床上同彤彤玩，用公仔引下彤彤，等佢試下去爬，佢竟然真係識爬到呀, 唔係拖住來爬，係真係用膝蓋來爬的，我仲即時影低咗，又叫埋老公一齊睇添~

二零一三年七月一日     星期一

今日係長假期嘅最後一日，由於打風關係，我哋揀咗去港鐵沿線嘅商場來行，起碼落雨都唔駛驚整濕身嘛~

所以我哋今日就去咗青衣城，仲可以去影下相添，因為果度有「壞蛋獎門人2」嘅佈置~

彤彤呢排除咗學爬外，仲學緊企，好鍾意扶住嘢企，但佢對腳仔又唔夠力，所以唔可以自己扶住嘢企，要靠其他人扶住佢先可以企到~

如果附近無其他人可以扶佢，咁點算呢? 咪唯有跪係度 lor，但我哋見佢有嘗試企起身的，但腳仔仍然未夠力，暫時只可以跪係度~

二零一三年六月三十日      星期日

今日係長假期嘅第二日，因為今晚要返我父母家食飯，所以費事帶彤彤去咁遠，近近去咗佐敦行下永安~

等咗成朝見我哋都未出街，彤彤係度扭計，扭我哋快 d 出街，ha ha....

過到去永安，先知係什麼震撼減價日 wor，點知人又多， d 嘢又唔係好平，所以都無乜嘢買，係老公買咗對波鞋~

之後我哋過咗去卓悅睇下 Merries 大碼片片有貨未 (之前搵咗好耐都未有貨，要買住其他牌未用住先)，點知好好彩仲有 2 包 wor，即時買咗先，費事比 d b6 掃埋，之後我哋見時間尚早，就去 Coffee Shop 坐下 hea 一陣，再返藍田~

二零一三年六月廿九日   星期六

今日係長假期嘅第一天，一早 7 點幾就比彤彤 d 喊聲叫醒咗，因為彤彤肚仔餓，所以唯有起身開奶，餵完奶又瞓唔返，所以就起身煲定粥仔比彤彤一陣食，但彤彤就好快瞓返 lu~

自從有高人指點，煲粥仔要放 2 粒蜜棗落去煲，彤彤開始鍾意食粥粥喇，仲會追食，比遲少少都唔得添，所以而家放心晒~

今日煲咗南瓜肉片粥，等彤彤瞓醒咗，就同佢沖涼洗頭，之後就餵埋粥仔，就換衫出街街，攪得來都成一點先出到門口~

今日真係好鬼熱，所以都幫彤彤塗定 d 防曬先得，唔係費事曬黑晒 (本身皮膚都有少少黑)，仲要戴埋太陽帽先掂~

二零一三年六月廿八日     星期五

返埋今日工，嚟緊有 3 日假期，所以返工嘅心情都特別好~

放工後，帶咗彤彤去油塘行一陣街，再食晚飯~

近排好鍾意過去油塘大本型呢個商場，貪佢夠近屋企(有綠 van 回家)，而且又唔駛係我父母果邊，孭住彤彤行斜路回家，所以我同老公而家多咗過來呢個商場食飯~

今次去咗 Riso Segreto 食，彤彤近排好鍾意睇餐牌，次次我哋同佢食飯，一見到個餐牌就會伸手出來拎，唔比佢掂/拎住，仲會扮喊添~

今朝瞓瞓下時，突然比嘢打咗一下，即時醒晒，望一望原來係彤彤隻腳一嘢踏過來我度~

彤彤真係幾爛瞓嫁，自從學識反身後，就仲爛瞓，除咗爬係度瞓之外，又會瞓瞓下成個人打橫咗，仲會越 "sir" 越低添~


今朝就係爛瞓到成個身打斜曬，又＂Fu＂晒d被，仲枕住隻手來瞓添@@

今日有點唔舒服，所以放咗一日假，於是傍晚就帶埋彤彤過咗去 Megabox 接老公放工，行經文具鋪，見到呢個平平地($22) 嘅益智玩具，所以就買埋比彤彤玩~



過到去 Megabox，彤彤仲未瞓醒，所以同老公行下 H&M 先，見到有副超而家平咗一半($20)，所以即買比彤彤~

行完 H&M，就去紅螞蟻食飯，之後就去影下 Winnie the Pooh & friends~

二零一三年六月廿三日    星期日

今日無乜嘢做，就同彤彤去 CityU 行下，順便去 canteen 食下下午茶 (因為果度食嘢好平的)，之後又去行咗陣又一城~

無聊入 H&M 行下，見到副 Kitty 太陽眼鏡，又 Cutie 又靚又平 ($49.9)，所以即時買比彤彤~

之後返咗我父母家食飯，食飽飽就回家，我先拎副超清潔，再比彤彤試戴，彤彤仲好似幾鍾意副超~

二零一三年六月廿一日    星期五

今日放工返去我父母家接彤彤，阿媽話彤彤出咗隻牙仔，仲要係下午先出現的，因為上午我望過唔見有，而阿媽又話係下午餵水比彤彤飲時先發現的~

二零一三年六月廿日 星期四

今日阿媽話比我知，彤彤識得拍手掌，仲識得伸開隻手叫人抱添，叻叻!~

彤彤早係 12/6/2013 就識叫 Daddy，近呢個星期仲日又叫，夜又叫 Daddy，就偏偏唔再叫 Mami，之前未識叫 Daddy 前，就成日都會叫 Mami 的，而家老公勁開心，因為彤彤成日叫，但 Mami 就唔開心了，彤彤唔記得咗我喇!~

不過老公都成日同彤彤講，Mami 好辛苦嫁，唔好剩係叫 Daddy，都要叫下 Mami 嫁，但彤彤好似無理過 lor，仍然繼續叫 Daddy~ 

有樣嘢好奇怪，彤彤唔鍾意食粥仔，無論白粥/菜粥/肉粥，全部都唔鍾意食，最多食幾啖就會發脾氣，或者係用粥噴我。但佢又好鍾意食米糊 (一定要用奶沖，用水沖係唔食的)，一餐可以食到一碗 bb 碗嘅份量 (大約係5 安奶 + 5 匙米糊粉)，再要加多 3 安奶先夠飽~

其實佢唔肯食粥呢個問題，都有少少困擾我，點解糊仔佢都肯食，瓜菜蓉又係好鍾意食，但偏偏粥仔佢唔食呢? 我已經試唔同稀杰的粥比佢食都唔得，亦試過用攪拌機攪到好幼細都係唔鍾意食~

但其實佢又有 d 為食嫁 wor，見到我哋食嘢，佢會望到實一實，有時仲會吞口水，或者伸手過來搶添，唔知彤彤幾時先肯食粥呢? 定還是我可以直接比爛飯比佢試下呢??

好似尋晚我同老公出街食飯，彤彤又係咁望住我，想我比佢食咁，大家睇下佢個樣幾嬲，嬲我唔比佢食，ha ha.....

另一為食樣，望住 Daddy 飲湯，睇到流晒口水，ha ha....

我哋發覺彤彤係一個爛玩，又好有好奇心嘅小朋友，乜都可以玩得一餐，係街上又會 "liu" 路過嘅人同佢玩 (係咁對人笑 / 叫人)，又鍾意摸下任何佢可以接觸到嘅東西~

最麻煩係換片嘅時候，自後佢學識反身後，就成日都想爬係度，除有嘢比佢玩緊，再加上佢嘅超強好奇心，換片嘅時候，就會反晒身，對手又不斷拎身邊嘅嘢，攪到 d 嘢跌晒落地。而家換片時，好多時都要老公幫手按住彤彤係換片墊上，然後我快手同佢清潔及換上新片片，手腳慢 d 都會比小小搗蛋王掃跌晒 d 嘢落地，到時就又執返 d 嘢仲煩!~

 尋晚搗蛋王又有新攪作，就係想拆咗張床圍~

我哋發覺彤彤個胸部都幾好肉地，幾個月大，就有兩團肉係心口上，仲有事業線添~

唔通佢第時大個咗，都會好好身材?!

尋晚彤彤沖完涼，隔咗一陣又比 d 口水整濕晒個心口位，婆婆幫佢用紗巾墊住隔一隔，彤彤好似裝咗假狗咁，幾好身材，ha ha....

二零一三年六月十七日     星期一

彤彤尋晚瞓教時有 d  咳，仲有少少鼻水，所以今朝帶彤彤過我父母家時，交帶咗佢哋晏少少帶彤彤睇醫生~

今朝彤彤好似好攰咁，7:30AM 都未醒，我哋抱佢起身時，見到佢攪住毛毛蟲瞓，好似好舒服咁wor~

雖然病病要睇醫生伯伯，但仍然有精神玩，媽咪先冇咁擔心~