Sharon & Victor & Tung Tung 幸福之家

二零一三年十月十日     星期四

彤彤 11 個月大喇!~

Daddy & Mami 祝你快高長大、健健康康、聽教聽話、聰明伶俐、生活愉快!~

呢排行街見到好多大型店舖都做緊減價，再加上外國商店嘅 Online Store 又做減價，所以都買咗唔少嘢比彤彤，簡直係荷包大出血~

大眾 8 折減價時買的:

二零一三年十月六日     星期日

老公話薩利亞 d 嘢真係幾好食，所以想去食多次，今次我哋揀咗荃灣果間，因為食飽可以順便行埋街街嘛~

二零一三年十月五日     星期六

今日又去咗灣仔果間 Playgroup，我哋早咗少少到，所以比彤彤係 playground 度 warm-up 下先~

今堂又係教天氣情況 (i.e. Sunny, Rainy, Windy, etc.)，同埋太陽系 8 大恆星，當然彤彤唔會明老師講緊乜啦，佢只係對 d Flash Card 有興趣，係咁爬出去拎 d Flash Card 來玩@@

上堂上到尾聲時，彤彤就開始扭眼瞓，係度開始扭計，又唔肯比我抱住來瞓，仲要係度大叫，真係比佢激 c~

二零一三年十月五日     星期六

今日一早出咗去九龍灣，因為果邊有間幾有口碑嘅幼兒園接受申請，所以要早 d 過去排列交表~

去到門口，條人龍唔太長，大約 2-30 個人度，但得一位職員收表，仲要左 check 右 check 嘢，所以都排咗大半個鐘先輪到我哋~

排隊期間，見間學校好似比較舊，同埋 d 職員好似有 d 黑面咁，我覺得佢哋唔太 nice lor~

到我哋時，個職員先講話本地班同國際班要分開報名，佢事前又無講明一份申請表只可揀二選一，咁我又無預備多一份申請表同回郵信封，咁唯有揀揀本地班算~

二零一三年十月四日     星期五

今日放工後，返我父母家接彤彤，之後就過去 Megabox 接老公放工~

我哋先去紅螞蟻食飯先，因為之前係 OpenRice 團購買咗 d  coupon ，所以想用咗佢先~

二零一三年十月一日     星期二

一連 4 日嘅長假來到最後一日了，真係有 d 唔捨得添，ha ha......

今日我哋瞓到 10 點幾先起床，仲要係彤彤比我早起床，佢係我身邊玩咗一陣，見悶就爬過來我度拍我起身陪佢~

彤彤見我拎住部手機影佢，佢仲即時想撲埋來搶我部手機添~

二零一三年九月三十日     星期一

今日係我嘅生日，好開心今年多咗彤彤同我一齊慶祝生日，今年嘅生日願望好簡單，就係希望我哋一家人身體健康，生活愉快，彤彤快高長大，聰明伶俐，聽教聽話~

今年慶祝生日都同往年一樣，就係去海洋公園，今年仲多咗彤彤同我哋一齊去玩添，但好可惜，今日竟然大部份時間都落雨，中間都有 2 個鐘度係陰天的，叫做可以同彤彤一齊影下相，所以我哋場趁無雨落，就同彤彤影下相先~

二零一三年九月廿九日     星期日

今日我哋帶咗彤彤去大埔鐵路博物館，點知去到大埔時，有時時雨落，有少少掃興 feel，不過我哋都係照去~

二零一三年九月廿八日     星期六

食完 Tea ，我哋就過咗去太古 Aeon 行下，一直都想買多架輕 d 嘅 BB 車，因為架 P3 真係太重，我自己一個人帶彤彤出街，我一定唔會用，但如果用孭帶，我條腰用會痛 wor，所以仲係心大心細中，而且我又驚老公唔比買，於是把心一橫，事前無同老公提過，就直接帶老公去試下車先，等佢感受下輕身車嘅好處~

其實之前都有上網做過 research 的，本身我唔想買淘寶 / 無牌字的士的車，所以睇咗唔同人嘅 comment 之後，只有 Aprica Magical Air 579 (2.9kg) 同埋 Combi F2 (3.9kg) 合我心水，2 部價錢都差唔多，但我嫌 F2 重多 1kg，前面無圍欄，同埋個坐位比率窄，所以最後鎖定 Aprica Maagrical Air 579~

一去到 Aeon 就先去 BB 部，睇下部 BB 車嘅實物先，一拎上車，真係好輕呀，已經勁鍾意喇，之後游說老公放埋彤彤上車試下車先，彤彤真係醒目，即時表現出好開心好舒服咁 (真係識配合 Mami 的計劃，ha ha.......)，根住我打蛇隨棍上，話部車點好點好，又話 P3 真係太重，上落扶手電梯好危險等等，終於比我打動到老公肯比我買~

二零一三年九月廿八日     星期六

上午幫彤彤報完名，再飲埋茶，又未夠鐘帶彤彤去上 Playgroup，我哋就去咗 Cafe 坐下先~

之後我哋就過返灣仔，帶彤彤去上 Playgroup，今次又係去返上次果間 J.A.K.L.C.，今堂仲 crazy，老師竟然教天氣情況 (i.e. Sunny, Rainy, Windy, etc.)，仲教埋太陽系 8 大恆星添，呢班最大嘅小朋友都只係得 18 個月大，試問又點會聽得明你講乜呢?!

一上完堂，彤彤就開始扭眼瞓，一上孭帶就瞓著咗，我哋唯有去 PizzaHut 食個 tea，等彤彤可以瞓一陣，我哋又有得坐下咁~

二零一三年九月廿八日     星期六

今日一早八點就要起床，因為今日會好忙，我哋要係一個上午嘅時間內，去 5 間幼稚園，幫彤彤交 N 班嘅申請表~

我哋 9 點就出發，先去咗屋企附近果 2 間交表，之後再過咗去我父母家附近果 2 間交表，好彩全部都唔駛點排隊~

之後我哋去咗我最心儀幼稚園 -- 迦南，我哋大約10 點半去到，已經見到一條長人龍，排咗大約 1 個鐘就入到去，見到校舍好新好靚呀，彤彤仲周圍望，好似好鍾意呢度咁，希望你可以係度讀書啦~

二零一三年九月廿七日     星期五

今日係拍拖 10 週年紀念日，估唔到不經不覺就 10 年過去了，今年仲多埋彤彤同我哋一齊慶祝添，希望嚟緊我哋一家三口仲好好多個 10 年~

既然今日係拍拖 10 週年紀念日，當然要去慶祝下啦，但帶住彤彤，又唔可以去太遠，所以近近地去咗 APM 睇下有乜嘢好食~

原先諗住去牛陣的，點知執咗笠，所以就改咗去王家沙~

二零一三年九月廿三日     星期一

彤彤終於有意欲想自己企起身，唔駛扶住嘢，但當然仲係未成功啦，加油呀!~

二零一三年九月廿二日     星期日

今日係我嘅農曆生日，但由於颱風天兔就來吹到埋來香港，所以今日無特別出去慶祝，只係帶彤彤去了附近嘅圖書館睇下書，同埋去 759 買下嘢就回家了~

下午在家中渡過，陪下彤彤玩下，瞓下晏教，睇下借返來嘅小說，就渡過咗今年嘅農曆生日了~

彤彤：今日 Mami 農曆生日，祝 Mami 身體健康，生活愉快!~ 多謝 Mami 比我嘅生日利是!~

二零一三年九月廿一日     星期六

同彤彤返完 Playgroup，我哋就過咗去維園睇花燈，估唔到我哋六點幾去到，都已經有好多人入咗場，仲以咁早會為小 d 人添，ha ha.......

二零一三年九月廿一日     星期六

食完 Buffet，我哋就帶彤彤過灣仔返 Playgroup，今次係經團購買的，$299 有 4 堂，仲可以揀星期六返。

見到都幾低下，所以問下姑仔會唔會一齊報，因為佢囝囝而家 17 個月，可以同彤彤同一班一齊上 (10-18 個月)~

我哋 3:30pm 就上到去，一入門口已經覺得好細，Reception 位只夠 2 - 3 個人企，waiting area 又係好細，仲要分咗一部份來做 playground，比 d 小朋友 warm-up 下先上堂，所以我哋都比彤彤入去玩咗陣~

二零一三年九月廿一日     星期六

由於尋晚果餐生日飯食得唔太好，所以今日補返數，去佐敦諾特富酒店食 Lunch Buffet，仲有買一送一添，2 個人食埋單都係 $28x，都算幾低下，而且都幾好味添~

酒店仲安排咗張 bb 椅比彤彤坐，彤彤見我哋食嘢，但佢無份食，係度係咁大叫~

二零一三年九月廿日     星期五

由於之前係 Apple Store 成功訂咗 2 部太空灰 16G & 1 部銀白色 32G iPhone 5s，所以今日要依時過去悕慎廣場度取機~

我哋大約 3 點半到達，到去 check 咗一下資料就比我哋入去拎機，拎完機比埋錢，一出門口就有人問放唔放機，但價錢唔岩，所以無放，老公提議過返先達睇下再算~

咁又過返去先達，價錢高幾百一部，原先部銀白色，我係打算自用的，但原來回收價比太空灰高好多，所以打心一橫放埋佢，最多遲 d 先換機~

放完機，就同老公行一陣，問下老公想食乜補祝佢生日，老公提議食放題，咁我哋就去咁銀城果邊搵嘢食喇!~

二零一三年九月十九日     星期四

今日係一年一度嘅中秋節，又咁岩係老公嘅新歷生曰，祝老公生日快樂、身體健康、事事順景、生活愉快!~

由於撞正中秋節，所以今晚無特別同老公去慶祝，只係同老公嘅家人一齊食飯就算~

老公公司今日收早，佢 4:00pm 就可以放工，但我就無得早走，所以攪到成 7 點先返到去我父母家，接彤彤出返 TST 食飯~

老公等我放工嘅期間，去咗行咗陣玩具反斗城，仲買咗個玩具比彤彤添~