Sharon & Victor & Tung Tung 幸福之家

二零一三年十二月七日     星期六

因為公司有新 System 要係下星期一 roll-out，所以今日要返工公司做定準備工作；而老公就因為要去考試，唔得閒睇住彤彤，所以今日彤彤要由公公婆婆睇住~

因為工作關係，今日無得同彤彤出街，真係好唔開心呀，所以一放工，我哋就返咗公公婆婆食飯，我仲買咗彤彤鍾意食嘅蛋糕作為補償，老公又同彤彤玩騎膀馬，彤彤仲玩得好開心添~

二零一三年十二月六日     星期五

又到星期五，但明天要返工，所以今晚就同老公同埋彤彤過去大本型食飯，適縫今年係大本型一週年紀念，所以商場整咗條聖誕老人村，仲有 102 個聖誕老人係商場嘅唔同地方添~

彤彤自從踏入一歲後，開始為食了，見到我哋食嘢，佢都要食埋一份，食過岩口味，仲會不停問我哋拎來食，又會罵人比得慢添~

另外，我哋嘗試加入小量食鹽落去彤彤嘅食物度，彤彤即時愛上食粥、粉、麵、飯，唔似之前咁，食兩啖就唔肯再食~

二零一三年十二月一日     星期日

同彤彤參加完爬行比賽，我哋就過咗去 Megabox，睇下何潤東個簽名會完咗未，估唔到仲未完 (即係佢簽咗成 2 個鐘了)，我就即時迫埋去睇下可唔可以影到佢相，因為我真係好鍾意睇佢做嘅台劇嫁~

何潤東真人比上鏡更靚仔，更加 Man，又好高大，仲好 nice 添~

二零一三年十二月一日     星期日

之前幫彤彤報咗名參加 BB 日記舉辦嘅爬行比賽，所以今日就準時 3:45 到達場地登記~

今次彤彤又係抽到中間位置嘅賽道，心諗都係輸梗了，因為佢實會掛住八卦隔離線嘅 BB，ha ha.....

開始比賽前，大會有 10 分鐘時間，比各位參賽者熟習場地，估唔到彤彤見到 d 大波波，竟然會追住來爬，仲爬得好快添~

二零一三年十一月三十日     星期六

今日又係返 playgroup，今堂係最後一堂，但我哋都決定買多 12 堂，不過會升上 12-18M 果班，承惠 $2650，比之前貴咗好多呢~

今日因為遲咗少少出門口，所以我哋遲到咗 20 分鐘，好彩頭 15 分鐘只係 warm-up time，我哋入到課室先岩岩唱完第一隻歌仔~

之後都係玩下 Flash Card 認字，但今日彤彤好似唔係好在狀況，無之前幾次咁，第一時間就揀岩張 Flash Card，今日要考慮咗一陣先揀到岩~

另外果 d 同學仔，今日都有揀錯 Flash Card 嘅情況，可能天氣凍，大家都唔在狀態，ha ha.....

二零一三年十一月廿七日      星期二

今日係我哋嘅結婚 4 週年紀念日，今年彤彤第 2 次參加我哋的週年紀念廢祝，上年我就坐緊月，彤彤就仲未滿月，估唔到轉眼又一年了~

二零一三年十一月廿六日     星期二

當我沖完涼出來，見到成床都係濕紙巾，我真係嬲到出唔到聲@@

P.S. 盒濕紙巾我一早放高咗，但都比彤彤拎咗落床玩~

二零一三年十一月廿六日     星期二

今日我請了一天假，因為我媽咪要去將軍澳醫院嘅眼科覆診 (原先佢睇開聯合醫院的，但因為聯合裝修緊，所以要過來將軍澳呢邊覆住診先)，但我父母又唔識點去，同埋又唔得閒睇住彤彤，所以我就放一日假，帶埋彤彤陪佢哋一齊去~

我哋係早上先去飲早茶，仲比咗 d 腸粉比彤彤食，彤彤第一次食腸粉，食得津津有味呀，仲拍晒手掌添~

終於都比我影到彤彤上排果 2 隻仔喇!~ 而家彤彤有 4 隻牙仔喇!~