Sharon & Victor & Tung Tung 幸福之家

呢件事要由 2 年前講起，當時我媽咪係屋企樓下，見到有 d 區議員同埋地區健康中心攪 promotion，凡年滿 60 歲，可以用大約 $200 就有得做 body check~

咁我媽咪見咁平就報了名，點知話要排期排 3 年，排到先打電話通知。

由於我媽咪比佢 "抽起條引"，又想即刻做一次 body check，所以就去咗荃灣的港安醫院做一次 body check，當時好似係 2 千幾的，結果一切正常，只係有少少膽固醇過高，要食清淡 d~

由於已經去了港安醫院 check 過，再加上已經係 2 年的事，所以我哋都唔記得咗地區健康中心果個 booking 喇~

     *     *     *     *     *     *     *     *     *     *     *     *     *     *     *     *     *     *     *     *     *

就係我同老公結婚前 2 個星期，媽咪收到地區健康中心的電話，話由於唔係太多人的關係，個期快咗，2 個星期後 (即係 27/11/2009 我結婚果日) 就輪到我媽咪可以做 body check，咁媽咪就同對方講果日唔得，於是就 delay 到 12 月中先去做~

     *     *     *     *     *     *     *     *     *     *     *     *     *     *     *     *     *     *     *     *     *

到咗做 checking 果日，有抽血又照肺的 x-ray，又驗小便等等，check 完之後約咗 1 月尾返去地區健康中心睇報告。

     *     *     *     *     *     *     *     *     *     *     *     *     *     *     *     *     *     *     *     *     *

到咗 1 月尾，Daddy 就同媽咪返去睇報告，地區健康中心的醫生就同媽咪講，係照肺的 x-ray 底片上，左邊的肺有個影，可能係照的時候比乳房遮住了，所以叫媽咪係 2 月頭再照多次~

當晚我返工回家後，佢哋已經同我講咗呢件事，果時我都有少少擔心，但我父母表面上又好似覺得無乜嘢咁，仲話早 2 年先係港安醫院 check 過，應該無事嘅~

     *     *     *     *     *     *     *     *     *     *     *     *     *     *     *     *     *     *     *     *     *

到咗 2 月頭，媽咪就再去照多次肺的 x-ray，再約埋 4 月頭返去地區健康中心睇報告。

     *     *     *     *     *     *     *     *     *     *     *     *     *     *     *     *     *     *     *     *     *

點知係 18/3，地區健康中心睇報告打電話來，話媽咪的 x-ray 底片返咗來，叫佢 19/3 上午過去睇報告，其實都有少少擔心，明明約咗 4 月頭又會突然提早叫媽咪過去睇報告，真係有 d 唔好的 feel 囉~

果日過到去，地區健康中心的醫生同媽咪講，呢次仍然照到有影，但佢就咁睇 x-ray 底片係估計唔到，果個影係 d 乜來的，所以穩鎮 d 都係去聯合醫院，排期照電腦掃描會清楚 d，就係咁個醫生就寫了張 referral letter 比媽咪拎去聯合醫院 book 期~

果日我 lunch 的時候打電話比 daddy，問下醫生點講，佢就話比我聽而家的情況，原先佢哋諗住星期一 (22/3) 先去聯合醫院排期的，但我叫佢哋下午就好過去，希望可以 book 到早 d 的期，check 清楚係乜事~

同時間，果日的下午，我係處於好擔心的狀態，既要係 office 做嘢，又要上網 check 下，如果肺 x-ray 照到有影，有 d 乜嘢情況，原來有好多情況的，例如肺積水、肺炎、肺氣腫等，當然最壞的情況係肺癌~

到差唔多放工的時間，Daddy 打電話比我，話聯合果邊睇完張 referral letter ，都唔知地區健康中心個醫生想轉介媽咪去內科定外科，再加上地區健康中心果邊又無比返 d x-ray 的底片比媽咪，更加令到聯合果邊唔知點好，咁 daddy 就同佢講返成個 case，聯合果邊的護士聽完之前就話幫媽咪 book 內科先，咁就係咁排期都要排到出年 6/4，所以一到放工時間，我就即刻趕返屋企，幫媽咪睇下張 referral letter 同埋聯合醫院果張 appointment letter 先~

返到去我父母屋企，睇到張 referral letter 就激氣喇，寫得唔清唔楚咁，完全又無寫 refer 個病人去邊，唔怪之得聯合果邊會唔知點 book 好啦~

而家要等 1 年先有得睇聯合果邊，仲要只係見醫生咋 wor，唔係即刻可以照電腦掃描，見完醫生先再決定，又唔知要等幾耐，所以我就同媽咪講，不如出去私家照咗先，如果真係有乜嘢事都早 d 知早 d 醫，唔駛等 1 年後先知係乜事~

既然係咁，我就叫 daddy 係下星期一同媽咪返去地區健康中心，叫果個醫生再寫過張 referrral letter，我哋自己出去私家醫生睇 & 照電腦掃描~

     *     *     *     *     *     *     *     *     *     *     *     *     *     *     *     *     *     *     *     *     *

點知到咗星期一 (22/3)，大約 11 點，我 daddy 去問地區健康中心的職員，想叫醫生再寫過張 referral letter，同埋問清楚係要做什麼 checking，個職員竟然叫我 daddy 下午再來過排隊拎籌，先可以見醫生，我 daddy 即時啋佢都傻，自己同媽咪去了平時睇開的家庭醫生(劉醫生) make appointment，借 d 易話有幾聲咳，又將媽咪而家情況講比劉醫生知，問下佢有乜 advice 比媽咪。

劉醫生一睇張 referral letter (又係上次果張)，又係講同一句說話：「點解張 referral letter 寫得咁唔清楚嘅 ??」

最後劉醫生就提議媽咪去照肺部的電腦掃描先，照咗返來佢度睇咗乜事先，如果有問題再 refer 媽咪去睇專科醫生。就係咁劉醫生就寫了一張醫生紙比媽咪，去觀塘的化驗所照肺部的電腦掃描~

我回家後即時幫媽咪打電話去化驗所 book 位照肺部的電腦掃描，原先要等多幾日先有位的，好彩化驗果邊的職員 (胡小姐) 聽我講完媽咪的 case 之後，知道我好擔心媽咪的情況，幫我 "zip" 了一個位比媽咪，但就一定要聽朝一早 9:00am 到達，交低醫生紙同埋費用，再係 3:00pm 返去照 (因為照電話掃描的醫生要下午先返)~

     *     *     *     *     *     *     *     *     *     *     *     *     *     *     *     *     *     *     *     *     *

23/3 一早 9:00am，daddy 就同媽咪到達化驗所，將劉醫生的 referral letter 交比胡小姐，同埋登記埋下午做電腦掃描的手續 & 交埋 d 費用~

胡小姐見媽咪無帶 x-ray 的底片嚟，又唔知個暗影係乜嘢位置同小大 (因為地區健康中心果邊的醫生，無比過任何底片比媽咪睇的，所以根本就唔知個影的大小同位置)，所以就話幫媽咪照多次 x-ray 先 (仲要唔駛收費添)，照完出來，化驗所的醫生已經即時話無事，唔係乜嘢大問題，但要清楚知道係由乜嘢引起，就要照埋電掃描先知，所以叫媽咪唔駛太擔心，下午再過嚟照清潔就 ok~

照完 x-ray 後，daddy 就同媽咪回家先，之後打電話比我，話返比我知個情況，我個心即時定返好多，其間 daddy 話比我知，媽咪係度等張 x-ray 底晒出來果時係勁擔心同埋勁驚的，知道無乜大問題即時鬆口氣~ (我都話佢哋係我面前扮無事、扮唔擔心，費事我太過擔心啦，佢哋又唔認 )

原先我係諗住下午放假陪埋媽咪一齊去做 checking 的，但 daddy 叫我唔好放假，因為化驗的醫生都話無大問題，留返 d annual leave 好 d云云~

到咗 3:00pm，daddy 同媽咪準時到達化驗所準備照電腦掃描，大約 45 分鐘就照完，化驗的醫生話一切正常，沒有問題，至於詳細情形，就等劉醫生再解釋~

就係呢個時候，聯合醫院突然打電話比媽咪(因為媽咪講嘢唔係好叻，所以將個砲話交咗比 daddy 同對方傾)，話因為醫生睇過媽咪個 case，覺得係 urgent case，所以 "zip" 了一個快期比媽咪，係 31/3 上午接見媽咪先，daddy 即時同對方講：「你之前話要等 1 年，我哋去了私家度 check 喇，而且都知道無事，所以我哋唔睇你果邊喇~」

點知對方話：「咁你咪照過來睇下先，難得有個快期比你，咁你哋帶埋 d 底片同報告過來，等多個醫生幫你睇下都好啦~」

就係咁，daddy 就應承咗下星期帶媽咪過去見埋聯合醫院的醫生~

     *     *     *     *     *     *     *     *     *     *     *     *     *     *     *     *     *     *     *     *     *

到咗 25/3，劉醫生果邊收到化驗所的報告，就叫媽咪返去睇報告，咁岩果日我唔駛返 office，去了上 training 可以早 d 回家，所以就叫媽咪等埋我一齊去聽個報告~

大約 5:30pm 就到咗劉醫生的醫務所，等咗大約 15 分鐘就到媽咪喇~

一入到去，劉醫生就即時恭喜媽咪先，話乜事都無，果個影只係一 d 舊的疤痕，可能係媽咪以前曾經試過好輕微的肺癆，連自己都唔知，自然咁好返咗，而留底的疤痕來的；又底者係曾經跌親，比 d 肋骨刮傷過 (媽咪話佢後生時真係跌到過，仲傷過 d 肋骨添)，所以劉醫生就話應該係後者喇~

今次照電腦掃描，影咗好多張底片，有橫切面、直切面，仲有前後咁影添，足足影咗 11 張大的底片 (每張裡面再有 16 張細的底片)，真係 check 得幾清楚~

係睇呢 d 底片的時候，劉醫生仲講比我哋知，係媽咪果張 x-ray 都見到，個影係長條型的，同有問題的影係唔同的 (cancer 通常係圓點來的)，其實一睇就知係疤痕唔係暗影~

仲有就係，我發現果個疤痕係响肺葉的邊緣位置，根本唔存在比乳房遮住咗所以影得唔清的問題，真係好奇怪點解地區健康中心果邊的醫生連呢 d 嘢都唔知，仲叫媽咪去聯合醫院照電腦掃描!!!

返到屋企之後，我同 daddy & 媽咪講，我真係覺得地區健康中心果邊好唔專業 lor，寫 referral letter 又唔清唔楚、疤痕同暗影又唔識分、連乳房的位置又攪唔清楚，我真係好想去 complain 佢哋 lor，駛多咗錢係事少，但比佢嚇親事大呀嘛~

究竟佢知唔知，2 位老人家比佢咁嚇一嚇，好多晚都瞓唔到，仲有我都擔心咗好耐，如果佢的專業知識好 d，根本一睇就知係疤痕唔係暗影，咁就可以排除到 cancer 呢個可能性啦 ~

Daddy 見我咁怒氣，叫我冷靜 d 先，同埋唔好去投訴喇，當破財消災 lor，同埋以後都唔同媽咪睇呢間地區健康中心~

     *     *     *     *     *     *     *     *     *     *     *     *     *     *     *     *     *     *     *     *     *

到咗 31/3，daddy 同媽咪去咗聯合醫院睇內科，仲比埋 d 電腦掃描的底片比醫生睇，但呢次個醫生就認為媽咪係曾經患過肺癆 (即係疤痕形成的第一個可能)，仲解釋得好清楚 daddy & 媽咪聽，同時想媽咪 check 清楚， d 肺癆好返未，所以就建議媽咪照多次 x-ray、抽血、驗尿、驗啖同埋照內窺鏡照肺 & 氣管。

但 daddy 同媽咪都唔想 check 咁多嘢，特別係內窺鏡，所以就同醫生講：「既然電腦掃描的報告都話無事，咁就費事再 check 咁多嘢喇~」

點知醫生話 check 清楚 d 好 d，唔想照內窺鏡就算，其他果幾樣就一定要 check，就係咁又要為每樣 check 排一個期喇~