十月二十日 (星期二)
今晚放工後，同老公仔一齊去了深水埗，先去鴨寮街買了 2 個拖板，一個 8 個頭，另一個就 6 個頭，都只係 $116 咋，真係好低~
之後就去了高登，買了一個 wireless 的 router ($225)，同埋 2 隻 wireless lan card ($113 一隻)，然後去食 dinner，就返新居。
大約 9:00pm 就返到新居，我同老公仔就分頭行事，佢就負責剪人名的 label (我將派帖的人名 print 咗係 d 透明 label 度，剪返出來就可以貼係帖封上面，好方便嫁~)；而我就負責 setup 新居的 wireless lan~
整到差唔多 10:30pm，我就 set 好晒個 wireless lan，老公仔部電腦同我部 notebook 都可以上網了，咁我就開始幫手貼 label 上 d 帖上面，大約 11:30pm 就離開新居，老公仔就送我回家，先再返佢屋企~
十月二十一日 (星期三)
第一批紅色炸彈出動喇 ~
我同老公仔各自回公司後，就將囍帖派比同事們~
十月二十四日 (星期六)
今日一早，老公仔又搬了好多嘢過去新居，之後就一齊搭車過中環，因為今日我哋要上律師樓簽擬結婚通知書。
大約 11:15am 就到達律師樓，之後好快就簽晒名，同埋辦好手續，唔駛 15 分鐘就走得了~
根住我哋就去了永安 shopping，又去了 delifrance 食 lunch，之後老公仔就返新居執嘢，我就去了太子等我 daddy，因為我哋要去我的舅婆屋企，派帖比佢同表叔~
去到大家一齊傾下計，daddy 就同舅婆傾返以前細個係鄉下的事，而我就教表妹計數，原來而家 F.1 的數學都幾難嫁，真係差 d 比佢考起啦~
大約 4:00pm 度，我哋就離開，根住同 daddy 返觀塘做西裝，我哋去了錦龍洋服，師傅比咗幾款布料我哋揀，由於 daddy 比較怕熱，所以揀咗 d 薄身的布料來做 ($1280)，而家約了 1/11 返去試身，睇下駛唔駛改，如果要改就 8/11 可以拎~
之後 daddy 就回家，而我就會合返老公仔，一齊去九龍灣果間 Ikea，買個細的櫃仔比老公仔放係書枱旁邊，順便係 Ikea 食埋 dinner。
之後我哋搭的士返新居，點知遇著個衰司機，首先見我哋拎住一盒嘢，我哋一上車毫同我哋講要收 $5 行李費，有無攪錯!!! 我哋果盒嘢係放係後坐的，又唔係放係車尾箱，我哋之前試過幾次，仲放得多嘢呀，之前的司機都無收我哋行李費啦，痴線嫁!!
之後又去錯屋苑 (初時我以為佢想行遠路的)，到達的時候，我哋問佢做乜停車，先知佢去錯地方。根住佢車返我哋去岩的屋苑，到達的時候個咪錶係 $48.x，老公仔話收 $50 啦，點知佢話 $50?? 點止 $50 呀，仲有行李費果 $5 都未計，我哋即時火都嚟，話佢去錯地方，根住佢又駁返我哋，路程差唔多啫，我哋話梗係唔係啦，上路同下路起碼差下錶啦~
佢見我哋開始惡惡地咁，就依依哦哦咁話當佢行錯路、當佢唔好彩咁，就找返 $50 比我哋 (我哋比 $100 佢找的)，真係離晒譜!!!!!
返到新居都差唔多 8:30pm 了，我哋就開工砌返個細櫃出來 (Ikea 賣的小型家俬多數都係散件包裝的，回家後要自行將佢哋還原的)，整咗大約 2 個鐘先整好，其間仲整錯過，要拆返出來再整過，真係有 d 難度啦。
大約 11:00pm 就離開新居了，老公仔就送我回家，然後再返佢屋企~
留言列表
