Sharon & Victor & Tung Tung 幸福之家

係上星期日結束的 Wimbledon Open (5/7)，我同一班 Federer Fans 係 MSN 一同見証一個新歷史的誕生 ~

經過一場破紀錄的五盤大戰，Federer 有驚無險咁羸出呢場苦戰，並且順利打破埋森柏斯所保持的最多大滿貫紀錄 (14 個)，成為歷史第一人，到目前為止，所獲得的大滿貫的數量，已經有 15 個了，並且亦都包括所有 4 個滿貫的錦標，恭喜晒 !!!

今年的 Wimbledon Open 一反過往的傳統，並沒有落雨的情況出現，令到因為防止落雨而加建的頂棚無用武之地 ~

第一盤開始，大家的發球都好好，令到比賽就呈膠著狀態，雙方都可以保到自己的發球局，直至第 11 局，Federer 成功迫出 Break Point，但 4 次破發機會都比 Roddick 全部救回，並且成功保到其鱔球局。接著到 Federer 的發球局，唔知係唔係受到之前次一局破唔到 Roddick 的影響，令到佢發球局出現狀態回落咗少少，並且被 Roddick 破發，先失一盤 ~

今場波有好多網球名宿來臨，唔知係唔係因為咁，令到 Federer 比了壓力自己，所以今日的 Unforce Error 比之前幾場波的較多，正反手亦都無之前咁好，Winner 的數字，亦都一度被 Roddick 帶出好多 ~

第二盤同第一盤如出一轍，比賽仍然膠著，係雙方都各自保到發球局之後，比賽要進入 Tie Break 來分呢盤的勝負~

Federer 一開始就比 Roddick 破了發球分，隨後又比 Roddick 破多一次，比賽去細分 2:6 的時候，當時 Roddick 手握 4 個 Set Point，我同一班 Federer Fans 都已經打定輸數，諗住 Federer 又會輸多一盤的了~

點知奇蹟的一幕出現了，Federer 連破 Roddick 3 次發球分，又順利保晒自己的發球分，連拎 6 分以 8:6 驚險地追返一盤 ~

比賽嚟到第三盤，同第二盤一樣，雙方都保晒各自的發球局，又要用 Tie Break 來分勝負，打到中段的時候，Federer 破掉了 Roddick 的 2 次發球分，但又比 Roddick 破掉了 1 次發球分，所以 Federer 以 7:5 羸多一盤 ~

第四盤早段，Federer 狀態出現下滑情況，被 Roddick 破了發球局，而又破唔返 Roddick 的發球局，所以被 Roddick 追返一盤，總盤數 2:2 打成平手，雙方要以最殘忍的方式來分勝負 -- 長盤決勝盤 ~

由長盤決勝盤唔會再有 Tie Break，所以一定要其中一方成功破掉對手的發球局，而又可以保到自己的發球局，並且最少要有 6 局在手先可以勝出 ~

由於前 4 盤，Federer 都未能破掉 Roddick 的發球局，而且已經比 Roddick 破了 2 次，我同一班 Federer Fans 都好擔心 Federer 會再一次飲恨 Wimbledon Open~

第五盤開始的頭幾局，都睇唔到 Roddick 的狀態有下滑的現象由於前一日開始，但 Federer 好似有點辛苦先保到發球局，仲曾經出現過一次 Break Point 比 Roddick 添~

由於前一日我已經有點傷風同頭痛，再加上睇到 Federer 陷於苦戰，而且處於下風，所以我的頭痛亦都進一步加劇，而我亦都開始無法再睇落去，只好瞓係張床，閉上眼睛休息，但由於我仍然記掛住呢場波，所以我仍然開著網上直播，用耳來聽戰況 ~

去到局分 8:8 的時候，我比 Federer 嚇到成個彈起身的，因為 Federer 係自己的發球局落後緊 15:40，我即刻起身睇下，好彩 Federer 全部救晒 d Break Point，仲成功保發，之後的比賽我全部都有睇到，因為我放心不下啦~

雙方再保多幾個個發球局之後，Federer 成功迫出 Roddick 的 Break Point，但都被 Roddick 一一救回，但睇得出 Roddick 的狀態開始下滑了，相反 Federer 好似越戰越勇咁，係自己的發局連開多個 aces 波，保發保得好輕鬆~

來到局分 15:14 的時候，Federer 再一次成功迫出 Roddick 的 Break Point，而今次 Federer 亦都再無浪費機會，成功破掉 Roddick 的發球局，以 16:14 勝出，結束了史上最長的一盤決賽的長盤決勝盤，呢盤波足足打了 90 分鐘 ，而 Roddick 第三次係 Wimbledon Open 的決賽輸比 Federer ~

而呢次破發係今場比賽，Roddick 唯一一次被破，佢之前已經連保 37 個發球局了~ 對於 Roddick 來講，佢真係輸得好唔甘心，因為破了 2 次 Federer 的發球局，而自己只係比對手破了一次就輸了成場比賽~

今日 Roddick 都表現真係好好，好有鬥心，仲曾經因為救波要跌到添~

從往績來睇，呢場一場一面倒的比賽，因為 Federer 對 Roddick 的往績係 18 勝 2 負，估唔到今次的交手，比賽要打到第五盤先分到勝負~ 係呢到要再一次讚賞 2 位球手的表現，為網球迷送上一場張力十足的比賽~

勝出之後，Federer 只是跳高大叫了一聲，並沒有流淚，以佢的性格，真係有 d 出奇呢 !~

唔知係唔係我本身易喊呢，之前 French Open 的時候睇到 federer 棒杯同埋之後的的報導，我都會不自覺流眼淚，而且睇返重播，亦都會流淚~ 但出奇地，佢今次羸了的時候，同埋棒杯的時候，我又無喊過 wor，反而覺得好平靜添 ~ (可能我都受到 Federer 的影響掛 ~)

而 ATP 亦都為 Federer 呢次的破紀錄，要整了好多 Video 同 Wallpaper 出來，以紀念佢的成就 ~

紀錄就破了，世界第一之位亦都比 Federer 奪回，嚟緊 Federer 一 d 都唔得閒，因為佢要為迎接佢同 Mirka 的第一個 BB 都忙碌呢 ~

係呢到要再一次恭喜 Federer 成為歷史第一人，同時亦都要祝 Mirka 順產，生一個健康快樂的小 Federer 呢~

仲有就係要多謝一班 Federer Fans，係 MSN 上陪著我傾談，一同見証呢個歷史時刻~

相信我哋仲有大把機會再見証更多次 Federer 破紀錄的時刻呢 ~