Sharon & Victor & Tung Tung 幸福之家

二零一三年十一月十六日     星期六

由於彤彤係細 B 嘅關係 (即係 8 月 31 日之後先出世)，所以即使我哋同佢報咗 8 間幼兒園，但一直都未有消息 / 通知面試嘅日期，直到十月尾收到一封信，叫彤彤去面試，我哋不知幾開心，但同時亦都有 d 擔心，因為彤彤一來係細 B，二來佢好似仲係乜都唔識咁，就算有得 in 都應該唔會收~

不過都唔諗得咁多，我哋先同彤彤扮靚靚，再係入學校前餵佢飲奶，等佢唔會扭計，希望佢可以比老師一個好嘅印象~

今日約咗 3:30PM 去面試，面試時仲要交埋份「認識你的孩子」問卷，呢份問卷我在家填寫時，都用咗一 d 時間去填，希望可以幫到彤彤加分啦~

我哋大約3:15PM 就到達，要係課室門外等侯，同埋只可以得一位家長陪同面試，所以就由我去陪彤彤入去面試~

準時3:30PM，就有老師叫我哋入去課室，課室內唔可以影相，入面有 3 張放滿玩具嘅枱，牆邊亦有唔同嘅大型玩具同圖書閣，課室內有 3 位老師，每位老師負責見 2-3 位小朋友~

今日面試的形式係 group interview，老師會同小朋友玩下玩具，同時亦會問家長問題~

我哋入到課室，要先自選一張枱坐下，我當時好快咁望一望每張枱有 d 乜，一張係放圈圈玩具，呢張一定唔揀，因為彤彤唔識放圈圈，而且佢最鍾意丟圈圈落地; 另一張係積木同埋串珠，呢張都係唔會揀，雖然彤彤都幾鍾意玩串珠，但呢樣嘢無乜嘢可以表現到比老師睇，至於積木，彤彤係又唔識疊高，而且又會丟 d 積木落地; 至於第三張枱，上面有好多車仔，雖然彤彤未玩過，但見到新玩具，佢應該會好開心，同埋會表現得好好奇，所以就決定揀呢張枱坐下~

老師先同我哋張枱嘅另一位小朋友及家長傾計，之後先到我哋~

老師先問我平時點叫彤彤，之後就對住彤彤講「彤彤」，彤彤好識做即時望住老師，仲擺出一個好開心的笑容比老師睇~ 

今日老師叫咗幾次彤彤，佢次次都有反應，次次都即時望住老師笑，連老師叫另一個彤彤，佢都照回應~ (平時我點叫佢，佢都唔理我，估唔到佢識應老師?!)

老師問下彤彤識行未，又問下佢識唔識玩車車，我同老師講，佢未玩過車車的，根住老師話唔緊要，我哋玩另一樣嘢~

之後老師拎咗個洋娃娃公仔出來，老師先指一指眼睛，話呢個係眼睛，叫彤彤指一次眼睛比佢睇，彤彤竟然即刻指到；之後老師再同時用2隻手指，指一指鼻同口，話呢個係鼻，再問彤彤邊個係鼻，彤彤竟然指得岩。我覺得佢撞彩居多，因為我從來無教過佢眼耳口鼻的，但平時彤彤同我一齊瞓時，好鍾意篤我的眼耳口鼻，唔知係唔係因為咁，佢見到個洋娃娃公仔就想篤下佢~

老師叫我哋周圍玩下，佢要同另一位小朋友傾下計先，但我估佢有暗中留意彤彤的表現的~

我哋繼續係度玩下車仔，點知彤彤丟咗架仔落地，我已經幫佢報了2次，第3 次比老師見到，老師行埋來話唔緊要，自己過去執返，我就扶彤彤行過去，等佢自己執，點知佢執起咗，但手仔唔夠力，又跌返落地，我見老師見唔到，即時幫佢執返上枱~

之後我哋過了另一張枱玩串珠，果然不出我所料，彤彤真係幾鍾意玩串珠，原先係坐係椅子上玩的，但因為唔係好夠手長，玩玩下佢自己企咗係椅子上玩，仲玩得好開心~

之後彤彤見地上有 d 書，佢想落地玩，平時係家中，佢見到 d 書，唔係拎來睇，而係拎上手撕爛的，但今日出奇地，佢拎住本書睇@@

睇咗一陣書，有另一位老師叫另一位小朋友 clean up 地上嘅書，彤彤竟然有意慾做埋一份，但因為手仔控制力唔夠好，放低本書時，放唔到入個籃度~

之後彤彤又爬返過去玩串珠果張枱，老師又行埋來，比咗包餅比彤彤，叫佢比返媽媽，佢竟然真係比咗我，果刻我好surprise，因為平時佢只係鍾意拎嘢來玩，唔會肯比嘢人，我教咗佢好多次，都做唔到一次，估唔到佢今日做到?!

比完包餅比我，老師同彤彤講 byebye，彤彤當然係唔識回應啦，佢只係對老師笑笑口咁，之後我哋就離開課室，全個面試只係得 10 分鐘，結果會係 12 月 23 日前寄信通知~

我覺得佢今日做到果幾樣嘢，都係撞手神多，應該唔係真係識，但有今日咁嘅表現，我哋已經好滿意了~