Sharon & Victor & Tung Tung 幸福之家

二零一四年六月廿八日     星期六

上完 Playgroup，又未夠鐘去下個站，所以我哋就過咗去希慎廣場行下街先，先行下 Gap ，再行埋誠品，之後就去 Food Court 食甜品~

老公去買嘢食，我同彤彤就玩下自拍先~

自拍咗一陣，老公就買咗嘢食回來了，Yummy~

原先打算我同老公一人一碗糖水，彤彤就食半個布甸，我就食埋另外果半個，點知彤彤食晒成個布甸都不特止，仲想食其他嘢，咁老公都話有少少肚餓，所以又買多玩雞扒通返來，分 d 比彤彤食~ (阿囡你上堂前先飲咗 8 安奶，點解咁快又咁肚餓嫁?!)

食飽飽之後，我哋就去下一站，就係去 PQM 睇 1600 隻紙熊貓喇!~

原先我哋驚多人，所以一早就上網 Book 定時間，費事到時要排隊，點知我哋去到，其實唔預約都係可以直入唔駛排隊的，反而預約咗仲要比 d 職員 scan 返個 QR Code 先可以入去，變相仲慢咗@@

入去係門口就唔駛點排隊，但原來入到去係幾多人下的，果度又係露天，所以都幾熱下，好彩我哋下午6 點幾先入來咋，唔係加埋太陽伯伯，肯定熱 c 咗~

彤彤睇得好開心呀，係咁指住 d 紙熊貓叫我睇，但點知佢突然爆喊，原來又肚仔餓，所以就先搵個無咁多人的地方開奶比佢飲先~

原先老公抱住彤彤餵奶的，我就自己去自拍下的，根住有位小姐好好人，見我影得咁辛苦，就話幫我哋影，所以就有下面呢張相喇，彤彤都有一邊飲奶，一邊望鏡頭嫁~

飲完奶，彤彤仲未捨得走，所以又比佢睇多陣啦!~

影完呢 1600 隻紙熊貓，我哋就落一層，去花園仔果邊排隊同紙熊貓合照，排咗差唔多 20 分鐘先輪到我哋，一次會放 5 家人入內，一家人最多只可以同 4 隻紙熊貓合照，而我哋一家 3 口就可以同 3 隻紙熊貓合照，限時一分鐘~

由於時間咁趕，同埋花園仔呢度燈光又唔夠，再加上我哋又拎住嘢，所以呢度影出來的相真係麻麻~

影完相，我哋就要行返落中環搭車，果度 d 路又斜，又多梯級，仲要孭住彤彤來行，真係幾辛苦下~