Sharon & Victor & Tung Tung 幸福之家

二零一四年五月一日     星期四

週中有一日假期，當然要出來街啦，但一諗到明天又要返工，所以都唔打算去太遠嘅地方，近近地就去黃埔啦~

去得黃埔，當然會去行下 Aeon 啦，又會去行下大眾書局，同埋玩具反斗城~

近排彤彤好鍾意去玩具反斗城，因為有好多玩具可以比佢試玩，又有好多其他小朋友一齊玩 wor，所以次次都玩到唔捨得走嫁~

二零一四年四月廿七日     星期日

之前係網上同埋朋友口中，成日都聽到話深水埗玩具街好多平價玩具賣，所以今日就特登去睇下有無嘢岩彤彤~

但睇完之後，我覺得有點失望，可以我事前期望過高，以為真係好正，但點知...... 我覺得好多都係淘寶貨，而且價錢都 mark up 咗幾多下，唔係想像中咁平，同埋有好多鋪頭都係做批發的，唔可以單一件咁買，所以我哋行完一轉就走了，一 d 收穫都無~

之後我哋過返佐敦行街，但先去逸東果間 Coffee Shop 飲下咖啡先，之後就去永安行咗陣，然後就返我父母家食飯~

食飽飯後，彤彤聽到個電子琴的音樂，仲係聞歌起舞添，真係比佢笑 C 呀~

二零一四年四月廿六日     星期六

之前係 Aeon 買果張新床褥會係今日送來，所以我哋一早起床，拎走晒床上嘅嘢，再拎埋 d 床單去洗，然後就等送新床褥來~

大約攪到 1:00PM 先攪掂，之後就陪彤彤係床上玩下 (無床褥都照玩住先啦)，彤彤仲等登將隻腳篤入床板個 "loan" 度添，真係比佢激 c~

二零一四年四月廿一日     星期一

來到長假期的最後一日，由於明天要返工，所以今日都唔打算去太遠的地方，只係去咗行下 Aeon  就算了~

撞岩今日係 Aeon 嘅吉日，所以我哋打算去買張新的床褥，因為而家果張，成日都瞓到我周身骨痛，我懷疑係張舊床褥令到我咁，定還是因為生彤彤時打果枝無痛針的後遺症呢?

上網 check 過，原來金美夢的護脊床褥係唯有由脊醫推薦，又係消委員的選擇月刊推介的，所以我哋就買咗呢張床褥，今日吉日就有 95 折再 9 折，折後236X，仲送多 2 個太空枕，星期六就可以送貨，希望換咗床褥，條腰唔好再痛啦~

出門前，今日試下幫彤彤扎起 d 頭髮，扎起後成個牛奶妹咁，我就覺得幾 cute，但老公又話麻麻地 wor，所以最後都無扎起 d 頭髮出街~

二零一四年四月廿日     星期日

來到長假期嘅第三日，今日我哋去咗 Megabox ，因為彤彤今日入選咗「雀巢金裝能恩奶粉冠名贊助之Apple Baby星級Happy寶寶封面大招募」，今日要去 Megabox 果度試鏡。

参加的時候，並唔知道原來係要鬥多 Like 的，仲要係越早影越著數，因為張相早 d upload 上去比人 Like，去到的時間先知係咁，但見一場來到，就照去玩下啦~

我哋安排咗係 3:30PM 影，但我哋 1:00PM 就到咗 Megabox，所以就先去食 Lunch 先，之後就行下 Ikea 啦，近排彤彤好鍾意玩呢類串珠玩具，一玩開就唔停手~

二零一四年四月十九日     星期六

尋日由於長洲好多人，臨時改行程無去到，所以今日就補去返喇~

我哋先搭車去碼頭，由於唔係好多人坐，所以又可以比彤彤自己一個人坐一個位了~

我哋大約 3:20PM 去到碼頭，都唔算好多人，趕得切搭3:30PM 果班船，上到船後仲有吉位，所以我哋就比彤彤自己坐一個位喇~

二零一四年四月十八日     星期五

長假期的第一天，原先打算去長洲的，但臨出門前睇到有 Frd 係 FB 話碼頭排咗成千人，所以即時改行程，去迪欣湖~

我搭先打巴士去九龍站，再搭港鐵去欣澳站轉車，由於要等幾分鐘先有下班車，所以就係度同彤彤影下相先~

上咗迪士尼線，當然又要同彤彤係車箱內影返幾張相啦~

二零一四年四月十七日     星期四

返埋今日工，就可以連放 4 日，Yeah!~

所以一放工，就即時返去我父母家接彤彤，之後就去街街~

唔知點解彤彤好鍾意搭港鐵時，要握住扶手~

我哋揀咗去 Popcorn，但我哋先去將軍中心食飯先，再慢慢行下街同影相相~

先講扮嘢方面，呢排彤彤鍾意學嫲嫲擺一隻手係尾龍骨位來行 (因為嫲嫲腰痛，平時行路會放隻手係度來行)，彤彤扮出來真係好似嫁~

有時我哋係餐廳食飯時，想叫 waiter 埋來落 order，就舉高手叫人來啦，點知彤彤又跟我哋舉高隻手，真係勁攪笑~

除此之外，呢排彤彤開始學 Your Baby Can Read 內嘅小朋友係度做動作同埋跳舞，最鍾意係做 Head, Shoulder, Knee and Toe，有時又會做下返 Playgroup 時，唱歌時做的動作，總知就係無時停啦~

我哋又教識彤彤做 「扮 cute」嘅動作 (即一隻手指篤住個面珠)，同埋做「飛吻」，不過佢唔係次次都肯做比你睇的~

二零一四年四月十三月      星期日

因為近排睇到廣告，話新開咗個海馬館，仲話可以親親海馬添，所以就帶彤彤入去睇下，但睇完後完全覺得無乜特別 lor，只不過係幾個魚缸，放咗 d 海馬係度~