Sharon & Victor & Tung Tung 幸福之家

二零一四年三月十五日     星期六

今日又係返 Playgroup 嘅日子，今日我哋今日遲咗幾分鐘，所以彤彤今日無得入課室玩下玩具 warm-up 下先，就直接上堂~

今日唱咗 Hello Hello Song, Days of the Week, How is the weather, Shake Shake Shake 等等~

今日 Ms Agnes 教咗唔同嘅顏色，仲拎住 d Flash Card 問各小朋友邊隻係 Red, 邊隻係 blue 等等，彤彤次次都答得岩，叻叻~ 

之後就有親子畫畫時間，要同條彩虹填顏色，今日彤彤好合作，肯比我捉住隻手仔一齊畫，又無手多多走去攪 d 顏色筆，所以個成品都叫做 ok 啦~

二零一四年三月十四日     星期五

今日除咗慶祝白色情人節之外，我哋仲同我父母慶祝生日，祝佢哋生日快樂，身體健康，福壽安康，生活愉快，事事順景~

今日又係去海港開餐，係我點整菜時，彤彤又係度攪攪震，仲係度奸笑，氹到公公婆婆笑開懷~

自從彤彤識行之後，我哋每晚係我父母家接完彤彤之後，都會帶佢去行 Aeon Supermarket，放佢落地行下，因為呢個時間，Supermaret 內唔會好多人，而且地方又大又闊落，可以好放心咁比彤彤自己行下，當然我哋要係佢後面跟住啦~

玩具每樣$10已經覺得好底的了，而家買3件仲有多個八折，真係超級底呀！~

二零一四年三月九日     星期日

今日見天陰陰，又無落雨，又唔太凍，所以就決定今日入去花卉展喇!~ 但始終今日係星期日嘅關係，真係好多人呀!~

今次係彤彤第二次去花卉展，原先諗住佢識自己行，可以同佢影下相，唔駛下下都要抱住佢，但場內太多人了，而且彤彤又行得無乜方向咁，所以大部份時間都要抱住/捉住佢先影到~

由於帶住彤彤嘅關係，今年無帶單反相機，只係帶住部 DC 仔，但又手痕想影下花，同玩下景深，唯有用部 DC 仔頂下引先，推到最大光圈，再加光圈先決模式來過下手引~

我哋大約由 2:30PM 開始，行到 6 點先走，之後就返去我父母家食飯了~

二零一四年三月八日     星期六

今日又係返 Playgroup 嘅日子，今日我哋早到咗 5 分鐘，所以一夠鐘就可以入課室玩下玩具 warm-up 下先~

10 分鐘 warm-up 時間過去，小朋友們要幫手 clean-up 返 d 玩具，但彤彤好似都仲未識乜嘢叫 clean-up，大部份同學仔，都識拎 d 玩具放入箱，但彤彤仲係拎住 d 玩具，埋到去個玩具箱度唔會放低件玩具，有時仲會係玩具箱內拎 d 玩具出來添~

之後就唱下歌仔先，今日唱咗 Hello Hello Song, How is the weather, Round and Round the Garden, Rain Rain Go Away, Shake Shake Shake 等等~

二零一四年三月五日     星期三

由新年到而家，日日都好唔得閒，攪到今日先得閒少少，可以拆咗 d 行是，再點算一下，埋單今年都係有賺的，呵~呵~

上面果排係彤彤收到的利是，下面果排係我同老公兩個人夾埋收到的利是，量又唔夠彤彤多，銀碼當然都唔夠佢多啦~

第五次做包 @ 20140219：
Mode 10 麵團模式，行完整個模式再留在機中發酵多 2 個，才拎出來造型，再等發酵至2陪大，才拎入焗爐焗 30分鐘 (180度)
高粉 250g, 牛油 30g, 糖 4大匙，鹽 1 小匙， 酵母 1 小匙, 奶粉 2 大匙，水 150 ml
麵團手感：少少濕，分割後要加少少麵粉再搓
麵團分了 8 份，分別做了 4 個芝士火腿包及 4 個芝士腸仔包~
成品口感：好軟滑, 麵包組織好靚，發酵發得好好~

第六次做包 @ 20140222：
Mode 10 麵團模式，行完整個模式再留在機中發酵多 3 個鐘，才拎出來造型，再放入雪櫃低溫發酵一晚，第二日係雪櫃拎出來後，等發酵至2陪大，才拎入焗爐焗 25分鐘 (170度)
高粉 300g, 牛油 30g, 糖 4大匙，鹽 1 小匙， 酵母 1 小匙, 奶粉 2 大匙，水 150 ml, 蛋 25ml
麵團手感：少少濕，分割後要加少少麵粉再搓
麵團分了 14 份，分別做了 7 個椰檳包及 7 個柚子醬餐包~
成品口感：好軟滑, 麵包組織好靚，發酵發得好好~

第七次做包 @ 20140224：
Mode 1 基本模式 + 預約模式
高粉 250g, 菜油10ml, 糖 2大匙，鹽 1 小匙，酵母 1 小匙，韓國香蕉奶 130 ml, 蛋 30ml
成品口感：好鬆脆及軟滑，但香蕉奶味唔夠濃

二零一四年三月三日     星期一

自從前 2 日開始小試牛刀咁行咗十幾步後，彤彤真係好似開咗"曉"咁，今日已經行得好穩，仲行得好耐都唔會跌~

今晚放工後，係我父母家接彤彤回家，我哋比佢係廳度自己行下，佢竟然一行就行咗個幾鐘，我哋中途想抱下佢/放返入 BB 床，等佢可以休息下，佢都唔肯，要自己落地行來行去~

二零一四年三月二日     星期日

由於我嫲嫲係上年尾去世，所以今年唔可以係清明的時候去拜山，要提早一個月去拜 (什麼新山不過舍)，所以今日就同一班親戚去拜山了~

我哋大約 11 點就到達，大約 12 點就離開，去荃灣一齊飲茶，之後我哋就自己去行街，親戚們同我父母就去二叔家開枱聯誼~

我哋帶咗彤彤去行下 Aeon 先，見唔係好多人，所以拖住佢行下先~