Sharon & Victor & Tung Tung 幸福之家

二零一四年二月十日     星期一

今日返奶奶家食飯，奶奶話姨婆買咗份禮物比彤彤，係個電子琴來的，仲有咪嫁~

彤彤：多謝三姨婆送比我嘅電子琴~

二零一四年二月九日     星期日

今日天氣唔多好，成日都陰陰天，有時仲落下雨添，所以我哋都唔打算去太遠嘅地方，就近近地去坑口新開果個兒童遊戲室玩下啦~

我哋大約 3 點鐘出門口，點知去到附近時，彤彤竟然瞓著咗，又開始有少少雨落，所以我哋唯由改變行程，上咗表哥仔家中坐下先~

上到去，先放低彤彤係表哥仔張網床度瞓，之後同就表哥仔玩下，到彤彤醒咗，就抱佢出來一齊同表哥仔玩，表哥仔仲借出佢心愛嘅車車比彤彤玩添~

二零一四年二月八日     星期六

今日又係彤彤返 Playgroup 嘅日子，所以我哋又要早少少起身，準備出門返 playgroup~

我哋大約 1:30pm 就到，又係先來 15 分鐘的 warm-up time，4 位小朋友一齊玩下玩具咁，彤彤今次仍然係鍾意玩煮飯仔，一見到又即刻拎上手玩~

二零一四年二月七日     星期五

彤彤都係比我哋鍚到太緊要，至會攪到而家都差唔多 15 個月都仲未識行路，所以我哋決定要迫下佢，出街時，如果人唔多，都會要佢自己落地行 (當然我哋會拖住佢隻手仔啦)~

好似今晚我哋食飽飯後，就拖彤彤行下商場，初時我哋係一人拖一邊的，但彤彤唔肯，所以就得返老公一個拖住佢行，仲行得幾好，同埋都行得幾耐下添~

其實我哋覺得，拖住彤彤行，佢真係行得 OK 嫁，但一唔拖佢，佢就即時要雙手襟住地下，好似好驚會跌咁，佢應該真係差咗少少信心，希望佢快 d 識行啦~

二零一四年二月四日     星期二

一連 4 天嘅新年假期，話咁快就放完，但放假有時仲辛苦過返工，因為要湊住彤彤四圍去拜年，仲要拎住 d 賀年禮盒同埋彤彤個奶粉袋四圍走，真係少 d 精力都唔得呀!~

今日馬年第一日開工，希望今年工作事事順利，特別係老公份工~

今日返公司，其實都無乜嘢做，都係派同收下利是咁，lunch 就同同事食餐飯，下午都係無乜嘢做咁就到收工時間了~

放工後同老公食飯，之後返我父母家接彤彤，點知一摸，彤彤又係手腳熱熱地，摸下個頭仔又係熱熱地，探一探原來發燒，不過唔係好高，只係 38.5 度~

二零一四年二月三日     星期一

攪乜鬼，今日又係好熱呀，仲熱過尋日，所以今日又要著短袖衫去拜年，Crazy!~

長假期嘅最後一日，今日又係要出去拜年，今日去老公個阿姨家拜年，係馬鞍山果邊~

由於我哋平時好少去馬鞍山，所以今日特登早少少過去行下街街先~

呢度都幾多嘢行，有馬鞍山廣場同埋新港城，而且 2 個商場都算大，我哋都行咗成 2 個幾鐘呀，之後就行過去阿姨家中拜年~

二零一四年二月二日     星期日

嘩..... 今日真係好熱呀，點解過年都會有 26-27 度咁熱嫁? 真係要著短袖衫先得，Crazy!~

今日我哋又要出去拜年，因為奶奶果邊的親戚，會來奶奶家中團拜，所以我哋當然要出席啦~

不過我哋就先去新都城食 lunch 先，之後再行下街，買下嘢先返去奶奶家~

二零一四年二月一日     星期六

今日係大年初二，又係忙碌嘅一日~

今日先去我父母家食開年飯，仲叫彤彤同公公婆補影返張合照 (因為尋日唔記得影)~

食飽飽後，坐咗一陣，就出發去老公的舅父家拜年，之後就過去酒樓，一齊同奶奶果邊嘅親戚團拜 + 食飯~

二零一四年一月三十一日     星期五

恭喜發財，祝各位身體健康，事事順景，馬年行大運!~

今日係大年初一，當然要四出去拜年啦，今年我同老公都係初五就要開工，所以初一至初四日日都要出去拜年，仲忙過返工呀!~

先講返今日的行程，我哋先去我父母家拜年，之後就返去老爺奶奶家食飯，之後又會合返我父母，去我爸果邊的親戚家團拜~

出門前，當然要派利是比彤彤先啦，祝彤彤快高長大、聰明伶俐、聽教聽話~

二零一四年一月三十日     星期四

今日老公有得收早，但我就無得放早，所以都係要等埋我先去接彤彤~

今晚先返去奶奶家食團年飯，見早早地，所以我哋就去坑口行下街先，之後再搭車去奶奶家~

行到咁上下，見東港城 d 佈置幾靚，就求其影咗幾張相，先去搭小巴~