Sharon & Victor & Tung Tung 幸福之家

二零一三年七月十三日     星期日

可能尋日去得太多地方，彤彤今日瞓到成 11 點先起身，飲完奶沖埋涼，又瞓過，仲要超爛瞓添~

彤彤你爛瞓到咁，成張床你瞓晒啦，媽咪唔駛瞓喇~

二零一三年七月十三日     星期六

今朝瞓到十點起身，之後就餵彤彤飲奶 & 沖涼洗頭，再過 cwb 返 playgroup，今次由 Daddy 陪彤彤上堂，我只可以係 waiting area 度，用 ipad 睇佢哋上堂嘅情況~

據 Daddy 講，今日都係有 5 位小朋友一齊上堂 (包括埋彤彤)，但其他 4 位小朋友都扭計，又係度輪流喊，有一位仲喊足全堂添，但彤彤無比其他人影響到，仲好投入去玩 & 聽老師講嘢添，真係叻叻呀!~ (由於今日由 Daddy 陪上堂，所以無影到相)

其間仲發生咗年事，彤彤比老師抽中出來玩遊戲，老師用毛公仔來引彤彤向前爬過 D 障礙物，彤彤一手就搶咗老師手上個毛公仔來玩，攪到老師好 surprise，老師好尷尬咁講 "She is so strong." ha ha......

之後成班B 又一齊玩玩具，彤彤見到另一位小朋友手上嘅玩具好似好玩D，佢竟然爬過去，用手拍拍下果件玩具，果位小朋友嘅媽媽就即時出聲話"咁細個就想搶玩具玩?" 攪到老公有D尷尬，只係笑一笑當回應~

二零一三年七月十二日     星期五


又到星期五，來緊又有2日假期陪囡囡，真係心情都特別好，ha ha......

今晚我哋又過咗去油塘大本型，好耐都無去過十勝牛度食飯，次次都鬼咁多人，所以今次叫老公早D過去拎飛等位，我就返我父母家接彤彤過去會合返佢~

今晚又係要等，因為我哋要卡位，所以仲要等得耐D添~

等位時，無無聊聊，又幫彤彤影下相啦~ 個傻豬，見到鏡中自己個樣，笑到見牙唔見眼，ha ha.....

二零一三年七月十日    星期三

今日彤彤 8 個月大喇，時間過得真係快~

Daddy & Mami 祝你快高長大、健健康康、聽教聽話、聰明伶俐、生活愉快!~

尋晚返6299家食飯，表哥仔都有來，咁彤彤坐係 high chair 上面玩玩具，表哥仔就係地下行來行去，我哋就食飯啦~

彤彤玩玩下，表哥仔行埋來，想睇&摸下佢個玩具，佢即時襟住個玩具，再用手拍表哥個頭，對腳又係咁踢，再加爆喊，之後姑仔抱走表哥仔，但佢都仲係好嬲咁發出d嗚嗚聲，之後表哥一出現係佢視線範圍內，佢就好緊張咁望實表哥仔，表哥仔行到邊，佢就跟住望去邊，連表哥仔行咗去 highchair 後面，佢都要伸個頭去後面望下，驚c表哥係後面搶佢個玩具咁，之後仲喊到唔收聲，我同老公點氹都唔得，之後快快食埋飯，話返屋企喇，一上孭帶即收聲，仲同爺爺麻麻笑添，真係比佢激c呀!~

仲有就係，近排佢有少少不滿，就有理無理都喊咗先，好似自己踢跌咗 d 嘢，驚我哋罵，就先發制人喊咗先(我哋都未開始罵佢)~

又例如，我哋抱住佢，想放低佢一陣，行開拎 d 嘢，都未放低，只係有少少意圖咋，佢已經喊咗先~

又例如，自己係BB床玩緊，見我哋唔係附近(因我哋做緊其他嘢)，又會喊爆，等我哋埋佢睇下佢~

隨住彤彤開始學爬同企，又已經坐得好穩鎮，之前係HSBC 獎賞錢網換嘅 3-in-1 車仔，終於都可以拎出來玩喇，彤彤都不知幾鍾意玩添!~

自從彤彤開始學爬，我哋就會盡量用玩具引下佢，等佢可以練習多D爬行嘅動作，但大多數時間都係床上陪佢玩，星期六/日先會係地上玩，因為驚佢會撞到埋去個電視櫃度。

近排見彤彤爬多咗，而且遲D學行，都可以只係响床上玩，所以就決定換咗個電視櫃，3 星期就起貨，都幾快手~

自從換咗個電視櫃後，我哋就多咗比彤彤係地上玩喇~

放彤彤係地上玩仲有一個好處，就係佢可以周圍咁摸下嘢 (佢係一個好有好奇心嘅BB，樣樣嘢都想摸下拍下)，同埋可以比佢用學行車扶住來企下，所以彤彤都幾鍾意係地上玩嫁~

二零一三年七月七日     星期日

今日無乜嘢地方好去，夜晚又要返我父母家食飯，所以就近近地去樂富行下~

由於今日搭港鐵關係，所以就用BB車帶彤彤出街，但唔知係唔係近排用慣 Hipseat，可以周圍望下嘢，我哋一放佢落BB車已經表現得好唔鍾意，之後我哋將BB車嘅坐位較返直，等佢可以望到周圍，佢先收聲唔喊咋~

二零一三年七月六日     星期六

同彤彤返完 Playgroup，我哋就去食 lunch ，之後就係 cwb 行咗陣，點知行行下落雨，所以就去咗皇室堡行下先，先去荷花，再行埋反斗城，點知都仲係落雨，見地下果層有D佈置，就行埋去影下相先~